Президент Шавкат Мирзиёев 2 октябрь куни «Соғлиқни сақлаш соҳасида давлат бошқаруви тизимини янада такомиллаштириш чора-тадбирлари тўғрисида»ги қарорни имзолади, деб хабар бермоқда «Gazeta.uz» Адлия вазирлиги матбуот хизматига таяниб.
Қарорга кўра:
Соғлиқни сақлаш вазири ўринбосари — Тошкент шаҳар соғлиқни сақлаш бош бошқармаси бошлиғи лавозими жорий этилди. Айни пайтда ушбу лавозим август ойи бошидан Ботирбек Исабеков лавозимдан озод этилганидан буён вакант бўлиб қолмоқда.
Соғлиқни сақлаш вазири ўринбосари — Республика шошилинч тиббий ёрдам илмий маркази бош директори лавозими тугатилди. 2017 йил апрелидан буён ушбу қўшма лавозимни 16 июлдан бери соғлиқни сақлаш вазирининг биринчи ўринбосари бўлган, аммо ҳали ҳам РШТЁИМга раҳбарлик қилиб келаётган Абдуҳаким Ҳожибоев эгаллаган.
Бундан ташқари, Қорақалпоғистон соғлиқни сақлаш вазири ва вилоятлар соғлиқни сақлаш бошқармалари бошлиқлари соғлиқни сақлаш вазири томонидан тегишлича Қорақалпоғистон Республикаси Жўқорғи Кенгеси раиси ва вилоят ҳокимлари билан келишилган ҳолда ҳудудий тиббиёт муассасалари раҳбарлари эса соғлиқни сақлаш вазири ҳамда Қорақалпоғистон Жўқорғи Кенгеси раиси ва вилоят ҳокимлари билан келишилган ҳолда вилоят соғлиқни сақлаш бошқармаси бошлиқлари томонидан лавозимга тайинланади.
2020 йил 1 ноябрдан Соғлиқни сақлаш вазирлиги ва ҳудудий бошқарув органлари ходимларига қуйидаги миқдорда кўп йил ишлаганлик учун ҳар ойлик устама тўланади (рағбатлантириш коэффициентини инобатга олган ҳолда лавозим маошига нисбатан коэффициентларда):
- 1 йилдан 3 йилгача – 0,3;
- 3 йилдан 5 йилгача – 0,6;
- 5 йилдан 10 йилгача – 0,8;
- 10 йилдан 15 йилгача – 1;
- 15 йилдан 20 йилгача – 1,2;
- 20 йилдан юқори – 1,5.
Изоҳ (0)