Amerikalik erkak tirik qolish uchun 114 kiloga ozishga majbur bo‘ldi

Amerikalik 238 kilo vaznga ega erkak hayot bilan vidolashmaslik uchun ikki baravarga ozdi.

Florida shtatida yashovchi 36 yoshli Brok Kerrou onasini yo‘qotib, tushkunlikka tushib qoldi hamda ko‘p ovqat iste’mol qila boshladi. Erkak onasining ichkilikka berilib, vafot etishida o‘zini aybdor deb hisoblardi.

Natijada Kerrou 238 kiloga semirib ketdi. Kunlardan bir kun erkak o‘zida uchta tanlov borligini anglab yetdi: o‘lgunicha ovqat yeb, hayot bilan vidolashish, o‘zini o‘ldirish yoki o‘zni qo‘lga olib, vazn tashlash.

Amerikalik barcha ommabop parhezlarni sinab ko‘rdi hamda shaxsiy trener izlay boshladi. Ko‘pchilik u bilan ishlashdan bosh tortdi. Shundan so‘ng u oshqozonini kichraytirish bo‘yicha operatsiya qildirdi. Operatsiyadan so‘ng esa jismoniy mashqlarni bajara boshladi.

Yozda 45 kiloga ozgan Kerrou haftada yetti marta sport bilan shug‘ullana boshladi.

U 2017-yilning aprelida operatsiya qildirgan edi, shundan beri 114 kilogrammga ozdi. U qat’iy parheziga ayrim o‘zgarishlar kiritdi, hozirda u nonushtaga fransuzcha buterbrod, tushlikka yupqa xamirli pitssa yeydi. Juda shirinlik yegisi kelsa, kaloriyasi past muzqaymoq iste’mol qiladi.

Endilikda Kerrou o‘z oldiga yangi maqsad qo‘ydi: u mahalliy politsiya bo‘linmasiga ishga kirmoqchi. Buning uchun u jismoniy tayyorgarlik bo‘yicha test topshirishi kerak.