Америкалик эркак тирик қолиш учун 114 килога озишга мажбур бўлди

Америкалик 238 кило вазнга эга эркак ҳаёт билан видолашмаслик учун икки бараварга озди.

Флорида штатида яшовчи 36 ёшли Брок Керроу онасини йўқотиб, тушкунликка тушиб қолди ҳамда кўп овқат истеъмол қила бошлади. Эркак онасининг ичкиликка берилиб, вафот этишида ўзини айбдор деб ҳисобларди.

Натижада Керроу 238 килога семириб кетди. Кунлардан бир кун эркак ўзида учта танлов борлигини англаб етди: ўлгунича овқат еб, ҳаёт билан видолашиш, ўзини ўлдириш ёки ўзни қўлга олиб, вазн ташлаш.

Америкалик барча оммабоп парҳезларни синаб кўрди ҳамда шахсий тренер излай бошлади. Кўпчилик у билан ишлашдан бош тортди. Шундан сўнг у ошқозонини кичрайтириш бўйича операция қилдирди. Операциядан сўнг эса жисмоний машқларни бажара бошлади.

Ёзда 45 килога озган Керроу ҳафтада етти марта спорт билан шуғуллана бошлади.

У 2017 йилнинг апрелида операция қилдирган эди, шундан бери 114 килограммга озди. У қатъий парҳезига айрим ўзгаришлар киритди, ҳозирда у нонуштага франсузча бутерброд, тушликка юпқа хамирли пицца ейди. Жуда ширинлик егиси келса, калорияси паст музқаймоқ истеъмол қилади.

Эндиликда Керроу ўз олдига янги мақсад қўйди: у маҳаллий полиция бўлинмасига ишга кирмоқчи. Бунинг учун у жисмоний тайёргарлик бўйича тест топшириши керак.