Tabiat haqidagi mashhur hujjatli filmlar muallifi britaniyalik tabiatshunos va teleboshlovchi Devid Attenboro Instagram sahifasida yuqori tezlikda eng ko‘p obunachiga ega bo‘ldi, shu tufayli u Ginnesning rekordlar kitobiga kiritildi. Bu haqda kitobning rasmiy sayti xabar berdi.
Ma’lumotga ko‘ra, 94 yoshli Attenboro 4 soat davomida million kuzatuvchi yig‘gan. Uning birinchi postida global isish muammolari haqida gapirilgan edi.
“Men 60 yil davomida televideniye va radioda ishladim, ammo bu Instagram’da birinchisi”, − deydi Attenboro.
Shuningdek, videoda teleboshlovchi dunyo muammolarga duch kelganini − qit’alar olovda, muzliklar eriyotganini ham ta’kidlab o‘tgan.
Devid Attenboro Instagram sahifasini o‘zi yuritmaydi. Unga “Bizning sayyoramizdagi hayot” hujjatli filmida birga ishlagan Kollin Batfild va Jonni Xyuz yordam beradi. Ular ijtimoiy tarmoqlar Attenboro uchun odatiy emasligini ta’kidlaydi.
Shuningdek, avvalgi rekord Jennifer Enniston tomonidan o‘rnatilgan edi. U 2019-yil oktabr oyida Instagram sahifasini ochdi va 5 soat 16 daqiqada million obunachiga ega bo‘ldi. Bungacha rekordchilar ro‘yxatiga futbolchi Devid Bekhem va Papa Fransisk kirgan edi.
Izoh (0)