Toshkent shahar Shayxontohur tumanida 23-sentabr kuni kechki payt voyaga yetmagan o‘smir ikki nafar o‘rtog‘i bilan avtomobilda pichoq va boshqa qurollarni olib yurgani aniqlandi. Bu haqda Toshkent shahar IIBB xabar berdi.
Ma’lum qilinishicha, 23-sentabr kuni soat 22:15 da Shayxontohur tumani IIO FMB navbatchilik qismiga kelib tushgan xabarga ko‘ra, 1-son IIBga biriktirilgan hududdagi “Gulobod” mahallasida joylashgan Versal restorani yonida 20-30 kishidan iborat guruh to‘plangan.
Holatni tekshirish maqsadida Toshkent shahar IIBBning bir guruh xodimlari hodisa joyiga borgan. Voqea joyida to‘plangan odamlardan tashqari, ularga yaqin joyda haydovchisi va yo‘lovchilari voyaga yetmagan shaxslar bo‘lgan Nexia-2 rusumli avtomobil qayd etilgan.
Avtomobil 15 yoshli Abdulaziz F. boshqaruvida bo‘lgan. O‘smirning so‘zlariga ko‘ra, uning ota-onasi bundan bexabar bo‘lgan. Yo‘lovchi sifatida avtomobilda uning o‘rtoqlari — 16 yoshli Mirjavohir M. va Ismoiljon A. borligi aniqlangan.
Avtomobil yukxonasi tekshirilganda IIB xodimlari u yerdan kesuvchi buyumlar, nunchaki, tayoq va elektroshoker topgan. Mazkur fakt asosida tezkor ishlar olib borilmoqda.
Eslatib o‘tamiz, Toshkent shahar Yunusobod tumanidagi tungi klub yonida 20-sentabr kuni bir guruh shaxslar o‘zaro janjallashishi natijasida yuzaga kelgan pichoqbozlik oqibatida 2 kishi — 18 va 23 yoshli yigit vafot etgandi.
Izoh (0)