Mablag‘larning noqonuniy olib chiqib ketilishi tufayli hukumatlar har yili ijtimoiy rivojlanishga sarflanishi mumkin bo‘lgan 500 milliard dollar yo‘qotmoqda, deb xabar bermoqda “Gazeta.uz” BMT matbuot xizmatiga tayanib.
Qayd etilishicha, dunyoda har yili 1,6 trillion dollar mablag‘ “yuviladi”. Bu dunyo YaIMning 2,7 foizini tashkil etadi. Yana trillion dollar offshorlarda joylashgan. Bunday ma’lumotlar noqonuniy olib chiqib ketilgan aktivlarni qaytarish va ularni barqaror rivojlanish maqsadlariga erishish bo‘yicha loyihalarga sarflash masalalari bilan shug‘ullanadigan yuqori darajadagi guruhning oraliq hisobotida keltirilgan. Guruh BMT Bosh assambleyasi va BMTning Iqtisodiy va ijtimoiy kengashi homiyligida 2020-yil yanvar oyida tashkil etilgan.
BMT ekspertlarining ta’kidlashicha, mamlakatlar rasmiylari korrupsiya, chet elga noqonuniy pul o‘tkazish va boshqa moliyaviy huquqbuzarliklarga qarshi qat’iyroq kurashishlari lozim. Bunday choralar tufayli hukumatlar katta miqdordagi mablag‘larni saqlab qolib, uni ijtimoiy va iqtisodiy rivojlanishga sarflashlari mumkin bo‘ladi.
“Dunyoda korrupsiya va soliqlarni to‘lashdan bo‘yin tovlash avj olmoqda. Ko‘plab banklar o‘zaro til biriktirgan, aksariyat hukumatlar o‘tmishda qotib qolgan. Barchamizni o‘g‘irlashmoqda, birinchi navbatda — dunyoning muhtoj qatlamini”, — degan Litva sobiq prezidenti va guruh vakili Dalya Gribauskayte.
Mutaxassislar AQSh Moliya vazirligining jinoiy pullarni legallashtirish va terrorizmni moliyalashtirishga qarshi kurash bilan shug‘ullanuvchi bo‘limi — FinCEN tomonidan yaqinda olingan bank hisobotlarini o‘rganish natijalari eslatib o‘tilgan.
OAVlar xabariga ko‘ra, yirik banklar jinoyatchilarga “harom” pullarni dunyo bo‘ylab o‘tkazishga ruxsat bergan. Tranzaksiya qilingan bunday pullarning miqdori 2 trillion dollarni tashkil etgan.
Guruh hisobotida, shuningdek, ko‘plab huquqbuzarlar koronavirus pandemiyasi atrofidagi vaziyatdan foydalanib qolgani qayd etilgan. Hukumatlar aholiga ijtimoiy yordam ko‘rsatishni osonlashtirish va iqtisodiyotni rivojlantirish choralarini ko‘rish uchun moliyaviy nazoratni yumshatgandi.
“COVID-19 pandemiyasi korrupsiya va moliyaviy jinoyatlarga qarshi turishga qodir emasligimizni yana bir bor eslatdi. Kasallik tarqalishiga qarshi kurash, hayotni saqlab qolish va yordam ko‘rsatishga ajratilgan resurslar korrupsiya va qonunbuzarlik tufayli yo‘qolmoqda”, — degan Nigerning sobiq bosh vaziri va guruhning hamraisi Ibrohim Mayaki.
Izoh (0)