Тошкент шаҳар Шайхонтоҳур туманида 23 сентябрь куни кечки пайт вояга етмаган ўсмир икки нафар ўртоғи билан автомобилда пичоқ ва бошқа қуролларни олиб юргани аниқланди. Бу ҳақда Тошкент шаҳар ИИББ хабар берди.
Маълум қилинишича, 23 сентябрь куни соат 22:15 да Шайхонтоҳур тумани ИИО ФМБ навбатчилик қисмига келиб тушган хабарга кўра, 1-сон ИИБга бириктирилган ҳудуддаги «Гулобод» маҳалласида жойлашган Версал ресторани ёнида 20-30 кишидан иборат гуруҳ тўпланган.
Ҳолатни текшириш мақсадида Тошкент шаҳар ИИББнинг бир гуруҳ ходимлари ҳодиса жойига борган. Воқеа жойида тўпланган одамлардан ташқари, уларга яқин жойда ҳайдовчиси ва йўловчилари вояга етмаган шахслар бўлган Nexia-2 русумли автомобиль қайд этилган.
Автомобиль 15 ёшли Абдулазиз Ф. бошқарувида бўлган. Ўсмирнинг сўзларига кўра, унинг ота-онаси бундан бехабар бўлган. Йўловчи сифатида автомобилда унинг ўртоқлари — 16 ёшли Миржавоҳир М. ва Исмоилжон А. борлиги аниқланган.
Автомобиль юкхонаси текширилганда ИИБ ходимлари у ердан кесувчи буюмлар, нунчаки, таёқ ва электрошокер топган. Мазкур факт асосида тезкор ишлар олиб борилмоқда.
Эслатиб ўтамиз, Тошкент шаҳар Юнусобод туманидаги тунги клуб ёнида 20 сентябрь куни бир гуруҳ шахслар ўзаро жанжаллашиши натижасида юзага келган пичоқбозлик оқибатида 2 киши — 18 ва 23 ёшли йигит вафот этганди.
Изоҳ (0)