Farg‘ona viloyati IIB xodimlari huquqni muhofaza qiluvchi idoralar bilan hamkorlikda o‘zi bilan bita, kastet, pichoq kabi kesuvchi va sanchadigan buyumlarni olib yuradigan shaxslarni aniqlash bo‘yicha tezkor tadbir o‘tkazgan. Bu haqda “Daryo”ga viloyat IIB matbuot xizmati xabar berdi.
Fuqarolarning xavfsizligi va osoyishtaligini ta’minlash, jinoyatlar va huquqbuzarliklarning oldini olish maqsadida shahar va tumanlarda o‘tkazilgan profilaktik tadbirlar davomida IIB xodimlarining qonuniy talabiga bo‘ysunmagan 17 nafar shaxsga ma’muriy bayonnoma rasmiylashtirilgan.
Shuningdek, fuqarolarga tegishli bo‘lgan 1 dona o‘tkir tig‘li xanjar, 3 dona o‘tkir tig‘li pichoq, 1 dona qo‘lbola tayyorlangan chopqi va 3 dona bita, 270 donadan ziyod turli o‘lchamdagi gilza va patronlar olib qo‘yilgan.
Hozirda aniqlangan holatlar yuzasidan surishtiruv o‘tkazilmoqda.
“Fuqarolarimizdan jamiyatimizda o‘rnatilgan tartib-qoidalarga to‘liq amal qilishni, noqonuniy buyum va vositalarni qonunga xilof ravishda saqlamasliklarini so‘rab qolamiz”, — deyiladi viloyat IIB matbuot xizmati xabarida.
Izoh (0)