O‘zbekistonda pandemiya davrida ajrimlar soni kamaydi

O‘zbekistonda pandemiya davrida ajrimlar soni kamaydi. Bu haqda Davlat statistika qo‘mitasi matbuot xizmati xabar berdi.

Qo‘mita ma’lumotlariga ko‘ra, 2020-yilning 8 oyida FHDYo organlarida respublika bo‘yicha 16 944 ta ajrim holati qayd etilgan. Bu ko‘rsatkich o‘tgan yilning shu davri bilan solishtirilganda 4 371 taga kam.

2020-yilning avgust oyida 2 381 ta (o‘tgan yilning shu davriga nisbatan 107 taga kam) ajrim holatlari qayd etilib, respublika bo‘yicha eng ko‘p ajrim Toshkent shahrida (350 ta) kuzatilgan.

O‘tgan 8 oy mobaynida FHDYo organlarida qayd etilgan ajrimlar soni bo‘yicha Toshkent shahri — 2 244 ta, Andijon — 1 999 ta, Samarqand — 1 793 ta, Toshkent – 1 738 ta va 1 700 ta bilan Farg‘ona viloyatlari yuqori o‘rinni egallagan.

Eng kam ajrim holatlari (578 ta) esa Navoiy viloyatida qayd etilgan.