Qarshidagi 3 ta bozor rahbariyati 1 mln so‘mdan jarima to‘ladi. Ular IIB xodimlari qonuniy talabini bajarmaslik va epidemiya qoidasini buzishda ayblangan

Qashqadaryo viloyatining Qarshi shahridagi uchta bozor rahbariyati 1 million 115 ming so‘mdan jarima to‘ladi. Bu haqda “Daryo”ga Qarshi shahar ma’muriy sudi raisi Azamat Xushvaqov ma’lum qildi.

Azamat Xushvaqovning ma’lumot berishicha, jarima to‘lagan mas’ullar Ichki ishlar organlari xodimining qonuniy talablarini bajarmaslik va epidemiyaga qarshi kurash qoidalarini buzishda ayblangan.

Ma’lum bo‘lishicha, 2020-yil 21-sentabr kuni Qarshi shahar “Ravoq” MFY hududida joylashgan “Naxshab” buyum bozori raisi Sh.R., “Sevinch” savdo majmuasi raisi Sh.T. hamda “Erqo‘rg‘on” oziq-ovqat ulgurji dehqon bozori raisi o‘rinbosari Sh.K.lar sanitar ishlarni amalga oshirmasdan faoliyat yuritib kelganligi aniqlangan. Shuningdek, ular tozalik kunida bozor faoliyatiga ruxsat bergan. Shundan so‘ng hudud profilaktika katta inspektori mayor M.Murodov tomonidan holat aniqlanib, mas’ullar ogohlantirilgan. Tozalik kunida bozorni yopish talab qilingan. Biroq bozor mas’ullari o‘zboshimchalikdan to‘xtamagan.

Vaziyat o‘nglanmagach IIB xodimi mas’ullarni javobgarlikka tortish masalasida sudga hujjat taqdim qilgan.

Mazkur ishni ko‘rib chiqqan Qarshi shahar ma’muriy sudi sudyasi Azamat Xushvaqov bozor mas’ullarini Ma’muriy javobgarlik to‘g‘risidagi kodeksning 194-moddasi 1-qismi (Ichki ishlar organlari xodimining qonuniy talablarini bajarmaslik) va 54-moddasi 2-qismi (Epidemiyaga qarshi kurash qoidalarini buzish) da ayblagan va bozor ma’muriyati rahbarlarining har biriga nisbatan bazaviy hisoblash miqdorining 5 baravari, ya’ni 1 million 115 ming so‘m miqdorida jarima jazosi tayinlagan.