Қашқадарё вилоятининг Қарши шаҳридаги учта бозор раҳбарияти 1 миллион 115 минг сўмдан жарима тўлади. Бу ҳақда «Дарё»га Қарши шаҳар маъмурий суди раиси Азамат Хушвақов маълум қилди.
Азамат Хушвақовнинг маълумот беришича, жарима тўлаган масъуллар Ички ишлар органлари ходимининг қонуний талабларини бажармаслик ва эпидемияга қарши кураш қоидаларини бузишда айбланган.
Маълум бўлишича, 2020 йил 21 сентябрь куни Қарши шаҳар «Равоқ» МФЙ ҳудудида жойлашган «Нахшаб» буюм бозори раиси Ш.Р., «Севинч» савдо мажмуаси раиси Ш.Т. ҳамда «Эрқўрғон» озиқ-овқат улгуржи деҳқон бозори раиси ўринбосари Ш.К.лар санитар ишларни амалга оширмасдан фаолият юритиб келганлиги аниқланган. Шунингдек, улар тозалик кунида бозор фаолиятига рухсат берган. Шундан сўнг ҳудуд профилактика катта инспектори майор М.Муродов томонидан ҳолат аниқланиб, масъуллар огоҳлантирилган. Тозалик кунида бозорни ёпиш талаб қилинган. Бироқ бозор масъуллари ўзбошимчаликдан тўхтамаган.
Вазият ўнгланмагач ИИБ ходими масъулларни жавобгарликка тортиш масаласида судга ҳужжат тақдим қилган.
Мазкур ишни кўриб чиққан Қарши шаҳар маъмурий суди судьяси Азамат Хушвақов бозор масъулларини Маъмурий жавобгарлик тўғрисидаги кодекснинг 194-моддаси 1-қисми (Ички ишлар органлари ходимининг қонуний талабларини бажармаслик) ва 54-моддаси 2-қисми (Эпидемияга қарши кураш қоидаларини бузиш) да айблаган ва бозор маъмурияти раҳбарларининг ҳар бирига нисбатан базавий ҳисоблаш миқдорининг 5 баравари, яъни 1 миллион 115 минг сўм миқдорида жарима жазоси тайинлаган.
Мавзуга доир:
- Ўзбекистонда март ойидан бери 640 мингга яқин карантин қоидаларини бузиш ҳолатлари аниқланган
- Тўйига белгиланганидан ортиқ одам чақирган «Браво» кулги жамоаси аъзоси Аҳмад Темуров жаримага тортилди
- Тўйини Tashkent City’да ўтказган Воҳиджон Исоқовга 4,5 млн сўм жарима ёзилди. «Аввалги жарима» нотўғри бўлиб чиқди
- Ўзбекистонда 6 ой давомида 620 мингга яқин фуқаро карантин қоидаларини бузгани аниқланди
- Республика бўйича карантин қоидаларига зид равишда энг кўп тўй ўтказилган вилоят маълум қилинди
Изоҳ (0)