Yoz jaziramasi uchun ayni muddao — yaxna kuksi retsepti

Turli xil sabzavotlarni o‘zida jamlagan, yengil hazm bo‘luvchi kuksi taomnomangizni yana bir retsept bilan boyitadi.

• 300 gr mol go‘shti;
• 2 dona tovuq tuxumi;
• 100 gr rediska;
• 300 gr bodring;
• 2 dona sarimsoq piyoz;
• 200 gr oq karam;
• 50 gr kinza;
• 300 gr ugra osh (lapsha);
• 100 ml o‘simlik yog‘i;
• 1 l suv;
• Ta’bga ko‘ra soya sousi, sirka, kayen qalampiri, mayda qora qalampir, shakar, tuz.

• Go‘shtni ingichka bo‘laklarga kesib oling va ikki daqiqa qizdirilgan tovadagi o‘simlik yog‘ida qovuring.

• Go‘shtga mayda to‘g‘ralgan karam, tuz, qora qalampir va kayen qalampirini qo‘shing va yaxshilab aralashtiring. Olovni pasaytirib, yana 10 daqiqa davomida pishiring. Tovani olovdan olib, ichidagini alohida idishga oling va sovishini kuting.

• Ugra oshni tuzlangan suvda qaynatib olib, sovuq suvda yuving. Ugra bir-biriga yopishmasligi uchun o‘simlik yog‘i bilan aralashtiring.

• Rediska va bodringlarni to‘g‘rang. Sarimsoq piyoz va kinzani maydalang, soya sousi, tuz qalampir va o‘simlik yog‘i bilan hammasini aralashtiring;

• Ikkita tuxumga bir chimdim tuz va ikki osh qoshiq suv qo‘shib, aralashmadan bir nechta ingichka omlet qovuring. Omletlar sovushini kuting, ularni o‘rab oling va ingichka ugra shaklida kesing.

• Muzli suvga to‘rt osh qoshiq soya sousi, bir osh qoshiq shakar, bir osh qoshiq tuz, ikki osh qoshiq sirka qo‘shib, yaxshilab aralashtiring.

• Tayyor bo‘lgan karamli go‘sht, to‘g‘ralgan omlet, ugra oshi va sabzavotli salatni idishlarga terib, ustiga suv, soya sousi va sirka aralashmasi bilan dasturxonga torting.

Yoqimli ishtaha!