Xamirli taomlarni ratsiondan chiqarganlar uchun ajoyib qovoqchali pitssa retsepti!
Kerakli mahsulotlar:
- Qovoqcha (kabachki) – 1 kg;
- Sut – ¼ stakan;
- Piyoz, sarimsoqpiyoz, ko‘kat – ta’bga ko‘ra;
- Pomidor – 3 dona;
- Tuxum – 2 dona;
- Tovuq filesi – 1 bo‘lak;
- Sabzi – 1 dona;
- Un – 50 gr;
- Qattiq pishloq – 50 gr.
- Tuxumlar sanchqi yordamida yengil aralashtiriladi. Qovoqchalar o‘rtacha qalinlikda parrak qilib kesiladi, avval tuxumga so‘ng unga botiriladi. Qizigan yog‘da har ikki tomoni qizartirilib pishiriladi. Tayyor bo‘lgan qovoqchalar yog‘ini shimdirib olish uchun qog‘oz sochiqqa yoyib chiqiladi. Sabzi o‘ta mayda bo‘lmagan qirg‘ichdan o‘tkaziladi. Sarimsoqpiyoz esa qirg‘ichning eng mayda qismidan chiqariladi. Pomidor parrak va piyoz yarim parrak holda kesiladi.
- Qolip yog‘lanib, qovoqchalar ikki qavat, ustma-ust holda joylashtirib chiqiladi. Ustidan yupqa kesilib, pishirib olingan tovuq filesi teriladi. Go‘shtning ustidan piyoz va sabzi, ustidan pomidor va oxirida sarimsoq solinadi.
- Parhezbop tovuq go‘shtidan tayyorlanadigan qovoqchali pitssa yuzasiga qirg‘ichdan o‘tkazilgan pishloq sepiladi va tuxum solingan sut quyiladi. Ko‘katlar, ziravorlar sepilib, qizdirilgan pechga qo‘yiladi. Toki pishloq eriguncha pechda pishiriladi.
Izoh (0)