O‘zbekistonda 2020-yil 28-iyul soat 23:30 holatiga ko‘ra, yana 194 kishida koronavirus infeksiyasi borligi aniqlandi va kasallanganlarning umumiy soni 21 893 nafarga yetdi. Bu haqda sog‘liqni saqlash vazirligi xabar qilgan.
Yangi kasallanish holatlarining
- 163 tasi Toshkent shahrida;
- 26 tasi Samarqand viloyatida;
- 5 tasi Toshkent viloyatida koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan.
Shuningdek, 28-iyul kuni Toshkent shahrida 381 nafar, Toshkent viloyatida 82 nafar, Andijon viloyatida 41 nafar, Sirdaryo viloyatida 23 nafar, Namangan viloyatida 20 nafar, Buxoro viloyatida 17 nafar, Navoiy viloyatida ham 17 nafar hamda Qoraqalpog‘iston Respublikasida 10 nafar, jami 591 nafar bemor tuzalib, rekord natija qayd etilgan.
O‘zbekistonda koronavirus infeksiyasidan sog‘ayganlar soni 12 265 nafarni (56 foiz) tashkil qilmoqda. SSV axborot xizmatining xabarida 9 502 nafar bemorga shifokorlar tomonidan belgilangan standartlar bo‘yicha davo choralari ko‘rilayotgani qayd etilgan.
Sog‘liqni saqlash vazirligi hisobiga ko‘ra epidemiya boshlanganidan beri O‘zbekistonda 126 kishi koronavirus asoratlari oqibatida vafot etgan. “Daryo” hisobi bo‘yicha koronavirusga chalingach, infeksiya asoratlari oqibatida vafot etganlar soni 132 nafarni tashkil etmoqda.
Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan.
Shuningdek, 22-iyulda Bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov, Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova koronavirus asoratlaridan vafot etgani xabar qilingan. Biroq ushbu olti holat haqida SSV tomonidan ayni vaqtgacha axborot berilmagan.
Bundan tashqari, taniqli rejissor Sarvar Karimov ham 17-iyul kuni otasi koronavirus infeksiyasidan vafot etgani, ammo unga tashxis qo‘yilmaganini ma’lum qilgandi. Rejissorning o‘zi va uning boshqa oila a’zolarida koronavirus tasdiqlangan.
26-iyul kuni bosh vazir o‘rinbosari Aziz Abduhakimov 24-iyul kuni Samarqanddagi Ipak yo‘li xalqaro turizm universitetining 33 yoshli magistranti O‘tkir Temirov kasallikdan vafot etganini aytgan. Ma’lum bo‘lishicha, marhum o‘zida COVID-19’ning barcha belgilari bo‘lsa-da, test ham topshira olmagan, kasalxonaga ham yota olmagan.
Izoh (0)