Toshkent viloyatida koronavirus infeksiyasi tarqalishining oldini olish tadbirlariga 63,4 milliard so‘m mablag‘ ajratilgan. Bu haqda viloyat hokimligi axborot xizmatiga tayanib “Kun.uz” xabar berdi.
Qayd etilishicha, mahalliy budjetning qo‘shimcha manbalari hisobidan 28,4 milliard so‘m ajratilgan. Shundan 4,9 milliard so‘m sanitariya-epidemiologiya osoyishtalik markazi, 20,8 milliard so‘m – viloyat sog‘liqni saqlash boshqarmasiga, 2,78 milliard so‘m esa tibbiyot xodimlarining 6 foizlik mukofot pullari uchun sarflangan.
Bundan tashqari, Inqirozga qarshi kurashish jamg‘armasidan 36,5 milliard so‘m karantin obyektlarida faoliyatni tashkil etish uchun ajratilgan. Jumladan, 3,7 milliard so‘m oziq-ovqatga, 500 million so‘m bir marta ishlatiladigan idishlarga, 1,8 milliard so‘m dori-darmon vositalariga ketgan.
“24-apreldagi Prezident farmoni ijrosini ta’minlash maqsadida sanitariya-epidemiologiya osoyishtalik markazi xodimlarining ish haqi miqdorini oshirish uchun 2,2 milliard so‘m, epidemiyaga qarshi kurash tadbirlarida qatnashgan 5905 nafar tibbiyot va boshqa xodimlarni moddiy rag‘batlantirish uchun 19 milliard so‘m mablag‘ ajratilgan.
Karantin muassasalarida 14 kunlik ish jarayonida qatnashgan 392 nafar xodimga qo‘shimcha rag‘batlantirish sifatida 9,1 milliard so‘m mablag‘ ajratilgan”, – deyiladi xabarda.
27-iyulda O‘zbekiston adliya organlari koronavirus pandemiyasi sharoitida tibbiyot xodimlariga kunlik qo‘shimcha va rag‘batlantiruvchi to‘lovlarning to‘lanishi bo‘yicha monitoring o‘tkazgani xabar qilingan, unga ko‘ra Toshkent viloyatida 23 million so‘m miqdoridagi mablag‘ to‘lab berilmagani oydinlashgandi.
Ayni paytda Toshkent viloyatida koronavirusga chalingan 1074 nafar bemor — 794 nafari uy sharoitida, 280 nafari esa statsionar sharoitda davolanmoqda. Statsionar sharoitda davolanayotganlarning 87 nafari Zangiota tuman yuqumli kasalliklar shifoxonasida, 115 nafari Olmaliq shahar yuqumli kasalliklar shifoxonasida, 58 nafari Qibray tumani markaziy kasalxonasida, 20 nafari esa respublika maqomidagi tibbiyot muassasalarida muolaja olmoqda.
Viloyat sog‘liqni saqlash boshqarmasining bergan ma’lumotlarga ko‘ra, kasallanganlarning 4 nafarining holati o‘ta og‘ir, 11 nafari og‘ir, 46 nafari o‘rta, 219 nafari qoniqarli ahvolda. Alomatlarsiz uy sharoitida davolanayotganlar 794 nafarni, pnevmoniya holatidagilar 69 nafarni tashkil etadi.
Izoh (0)