Ўзбекистонда 2020 йил 28 июль соат 23:30 ҳолатига кўра, яна 194 кишида коронавирус инфекцияси борлиги аниқланди ва касалланганларнинг умумий сони 21 893 нафарга етди. Бу ҳақда соғлиқни сақлаш вазирлиги хабар қилган.
Янги касалланиш ҳолатларининг
- 163 таси Тошкент шаҳрида;
- 26 таси Самарқанд вилоятида;
- 5 таси Тошкент вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.
Шунингдек, 28 июль куни Тошкент шаҳрида 381 нафар, Тошкент вилоятида 82 нафар, Андижон вилоятида 41 нафар, Сирдарё вилоятида 23 нафар, Наманган вилоятида 20 нафар, Бухоро вилоятида 17 нафар, Навоий вилоятида ҳам 17 нафар ҳамда Қорақалпоғистон Республикасида 10 нафар, жами 591 нафар бемор тузалиб, рекорд натижа қайд этилган.
Ўзбекистонда коронавирус инфекциясидан соғайганлар сони 12 265 нафарни (56 фоиз) ташкил қилмоқда. ССВ ахборот хизматининг хабарида 9 502 нафар беморга шифокорлар томонидан белгиланган стандартлар бўйича даво чоралари кўрилаётгани қайд этилган.
Соғлиқни сақлаш вазирлиги ҳисобига кўра эпидемия бошланганидан бери Ўзбекистонда 126 киши коронавирус асоратлари оқибатида вафот этган. «Дарё» ҳисоби бўйича коронавирусга чалингач, инфекция асоратлари оқибатида вафот этганлар сони 132 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.
Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат ҳақида ССВ томонидан айни вақтгача ахборот берилмаган.
Бундан ташқари, таниқли режиссёр Сарвар Каримов ҳам 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди. Режиссёрнинг ўзи ва унинг бошқа оила аъзоларида коронавирус тасдиқланган.
26 июль куни бош вазир ўринбосари Азиз Абдуҳакимов 24 июль куни Самарқанддаги Ипак йўли халқаро туризм университетининг 33 ёшли магистранти Ўткир Темиров касалликдан вафот этганини айтган. Маълум бўлишича, марҳум ўзида COVID-19’нинг барча белгилари бўлса-да, тест ҳам топшира олмаган, касалхонага ҳам ёта олмаган.
Изоҳ (0)