Sog‘liqni saqlash vazirligi Toshkent shahri Olmazor tumanida yashovchi 40 yoshli M.K. ismli koronavirusga chalingan 40 yoshli homilador ayolning vafot etganini xabar qildi.
Xabarga ko‘ra, Toshkent shahar Olmazor tumanida yashagan 40 yoshli M.K. 12—17-iyul kunlari shahar 2-son tug‘ruq kompleksida 30 haftalik 4-homiladorlik, 4-tug‘ruq, asoratlangan akusherlik anamnezi, bachadon chandig‘i, ikki tomonlama pnevmoniya, kamqonlik, nafas yetishmovchiligining 2-darajasi tashxisi bilan statsionar sharoitda davolangan.
Bemorda COVID-19 infeksiyasi borligi tasdiqlangach, u 17-iyul kuni shahar 3-son tug‘ruq kompleksiga o‘tkazilgan. M.K.ga COVID-19 infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan. Kasallik o‘tkir yurak qon-tomir va nafas yetishmovchiligi, sepsis, poliorgan yetishmovchiligi, DVS sindrom asoratlari bilan kechgan. Yuqorida keltirilgan hamroh kasalliklar bilan birga bemorda homilaning antenatal o‘limi ham kuzatilgan.
Shifoxonada bemorning davolanishi davomida shifokorlar tomonidan konsultatsiya va konsiliumlar qilingan, davolash jarayoni mutaxassislar tavsiyasi asosida olib borilgan.
“Bemorning ahvoli asosiy kasallik asoratlari hisobiga keskin og‘irlashib, mutaxassislar tomonidan o‘tkazilgan reanimatsion muolajalarga qaramay o‘tkir nafas va yurak qon-tomir yetishmovchiligi, sepsis, poliorgan yetishmovchiligi, DVS sindromdan vafot etgan”, – deyiladi SSV xabarida.
Koronavirusga chalingan homilador ayollarning o‘limi haqida ketma-ket beshinchi kundan beri xabar berilmoqda. Bugunning o‘zida koronavirusga chalingan ikkinchi homilador ayolning vafot etgani xabar qilindi. Avval Toshkentning Uchtepa tumanida yashagan 34 yoshli Sh.M. ismli ayolning vafot etgani haqida xabar berilgandi.
Bunga qadar 24-iyul kuni qashqadaryolik 35 yoshli ayol, 25-iyul kuni toshkentlik 34 yoshli ayolning homiladorlik vaqtida koronavirus tasdiqlangach hayotdan ko‘z yumgani, 26-iyulda esa Toshkent shahrida koronavirusga chalingan 32 yoshli ayolning vafot etgani, 27-iyulda Toshkentda 35 yoshli yana bir homilador ayolning COVID-19 asoratlari tufayli vafot qilgani haqida xabarlar berilgandi.
Sog‘liqni saqlash vazirligi hisobiga ko‘ra, mazkur bemor koronavirusning 125-qurboniga aylandi. “Daryo” hisobi bo‘yicha koronavirusga chalingach, vafot etganlar soni 131 nafarni tashkil etmoqda.
Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan.
Shuningdek, 22-iyulda Bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov, Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova koronavirus asoratlaridan vafot etgani xabar qilingan. Biroq ushbu olti holat haqida SSV tomonidan ayni vaqtgacha axborot berilmagan.
Bundan tashqari, taniqli rejissor Sarvar Karimov ham 17-iyul kuni otasi koronavirus infeksiyasidan vafot etgani, ammo unga tashxis qo‘yilmaganini ma’lum qilgandi. Rejissorning o‘zi va uning boshqa oila a’zolarida koronavirus tasdiqlangan.
26-iyul kuni bosh vazir o‘rinbosari Aziz Abduhakimov 24-iyul kuni Samarqanddagi Ipak yo‘li xalqaro turizm universitetining 33 yoshli magistranti O‘tkir Temirov kasallikdan vafot etganini aytgan. Ma’lum bo‘lishicha, marhum o‘zida COVID-19’ning barcha belgilari bo‘lsa-da, test ham topshira olmagan, kasalxonaga ham yota olmagan.
Izoh (0)