Tojikiston strategik tadqiqotlar markazi direktori Xurshid Ziyoiy mamlakatda yangi turdagi koronavirus pandemiyasi boshqa davlatlarga nisbatan fojiaviy kechmaganini qayd etdi. Bu haqda Asia-Plus xabar qilgan.
Uning so‘zlariga ko‘ra markaz pandemiyaning mamlakatdagi turli sohalarga ta’sirini o‘rgangan va bu boradagi takliflarini hukumatga kiritgan.
Ziyoiyning aytishicha, koronavirusning tarqalishi Tojikistonda hukumat va sog‘liqni saqlash vazirligi tomonidan vaqtida ko‘rilgan choralar, aholining xavfdan ogoh bo‘lib, ehtiyotkor bo‘lgani tufayli fojiaviy tarzda kechmagan.
“Uchinchi sabab bu – bizning ob-havo sharoitimiz, quyoshning ultrabinafsha nurlari har qanday virusni yo‘q qilishga qodir. Ko‘pincha “Gap quyosh nurida bo‘lsa nima uchun Saudiya Arabistonida virus yo‘q bo‘lib ketmadi?”, deb savol berishadi. Men u yerda uch yil tarjimon bo‘lib ishlaganman va ularning osmonida doimiy ravishda qum changlari bo‘lishini, bu quyoshning ultrabinafsha nurlarini to‘sib qo‘yishini yaxshi bilaman. Koronavirusni issiqlik emas, ultrabinafsha nurlar yo‘q qila oladi”, – degan Ziyoiy.
Ziyoiyning qayd etishicha, markaz shaharlarda yo‘nalishli taksi transportlari sonini kamaytirib, avtobuslarni ko‘paytirishni taklif qilgan. Uning fikricha, avtobuslar ijtimoiy masofalanishga amal qilish uchun qulayroq transport.
Ziyoiy tadqiqot haqidagi qolgan tafsilotlarni oshkor etmagan va markaz rasmiy taqdimotida barchasi haqida e’lon qilishini aytib o‘tgan.
Ayni vaqtda dunyoning boshqa davlatlarida ham, JSST tavsiyalarida ham quyoshning ultrabinafsha nurlari COVID-19’ni yo‘q qilishi haqida ma’lumotlar mavjud emas.
2020-yil 25-iyul holatiga ko‘ra, Tojikistonda 7104 nafar kishida koronavirus infeksiyasi aniqlangan, 58 kishi COVID-19 qurboniga aylangan, 5851 bemor kasallikdan sog‘aygan.
Izoh (0)