Qirg‘izistonda 30-iyul koronavirus qurbonlari xotirasiga milliy Motam kuni deb e’lon qilinadi. Bu haqda “Birinchi radio” davlat radiostansiyasining efiri vaqtida Qirg‘iziston prezidenti So‘ronboy Jeenbekov ma’lum qildi.
“Ushbu kunda vafot etgan hamyurtlarimizni xotirlash uchun Qur’on o‘qiymiz. Yana bir bor vafot etgan yurtdoshlarimizning qarindoshlari va yaqinlariga hamdardlik bildiraman. Har bir qirg‘izistonlik yuragida qiyinchilik, og‘ir yo‘qotishlar mavjud. Shu sababli hamyurtlarimizga sabr va matonat tilayman. O‘tganlarning oxirati obod bo‘lsin”, — deydi prezident Jeenbekov.
Avvalroq Qirg‘izistonga Rossiya Sog‘liqni saqlash vazirligi mutaxassislari koronavirus tarqalishiga qarshi kurashda yordam ko‘rsatish uchun FVV maxsus borti uchib kelgani to‘g‘risida xabar berilgandi. Idora ma’lumotlariga ko‘ra, Bishkekka Moskvadan 7 nafar mutaxassis, Ufadan esa 42 nafar tibbiyot xodimi uchib kelgan.
Qirg‘iziston Sog‘liqni saqlash vazirligining so‘nggi ma’lumotlariga ko‘ra, mamlakatda koronavirus bilan kasallanganlar soni 32 124 kishiga, virus qurbonlari esa 1249 kishiga yetgan.
Eslatib o‘tamiz, Qozog‘istonda 13-iyul — koronavirus infeksiyasidan vafot etgan fuqarolar xotirasi uchun Motam kuni deb e’lon qilindi. Shu munosabat bilan koronavirus pandemiyasi qurboniga aylangan fuqarolar xotirasiga butun mamlakat bo‘ylab Nur-Sulton vaqti bilan soat 12:00 da bir daqiqalik sukut saqlandi.
Izoh (0)