Xitoyda bir sutkada 34 kishi, Janubiy Koreyada esa aprel oyidan buyon ilk bor 113 kishida koronavirus aniqlandi

Xitoyda so‘nggi sutkada koronavirus bilan kasallanish bo‘yicha 34 ta va kasallik belgisiz o‘tayotgan 74 ta holat aniqlandi, bemorlarning 16 nafari sog‘aydi, deb xabar bermoqda “RIA Novosti” Xitoy Sog‘liqni saqlash milliy komissiyasiga tayanib.

Aniqlangan yangi kasallanish holatining 29 tasi mamlakatning o‘zida, qolgan 5 tasi chetdan yuqtirilgan. 24-iyulda 21 kishida, 23-iyulda 22 kishida, 22-iyulda 14 kishida koronavirus qayd etilgandi.

Mamlakatda umumiy hisobda 83 787 kishi koronavirusga chalingan, ularning 78 889 nafari sog‘aygan, 4634 nafar bemor COVID-19 qurboniga aylangan. Kasalxonada 261 kishi davolanishda qolmoqda.

Shuningdek, Xitoyda kasallik belgisiz o‘tayotgan 74 ta holat aniqlangan. Shunday kishilarning yana 251 nafari kuzatuvda bo‘lib turibdi.

Yangi kasallanish holatlarining 27 tasida virus mamlakatning o‘zida, qolgan 86 ta holatda chetdan yuqtirilgan. Mamlakat hukumati kunlik kasallanishlar orasida chetdan yuqtirish holatlari oshayotganidan xavotirda.

“So‘nggi 10 kunda virusni chetdan yuqtirish holatlari ulushi mamlakatning o‘zida yuqtirish holatiga qaraganda ko‘p bo‘ldi, bu esa kasallikning chetdan kirib kelishi holatlarining oldini olish uchun e’tiborni kuchaytirishni taqozo etmoqda”, — degan edi Janubiy Koreya bosh vaziri Chon Se Gyun hukumatning koronavirus bo‘yicha o‘tkazilgan 15-iyul kungi yig‘ilishida.

Janubiy Koreyada qonunchiligiga ko‘ra, COVID-19’ga chalingan chet el fuqarolari bepul davolanish huquqiga ega. Ayni paytda esa chet ellik fuqarolarning koronavirusga chalinishi holati oshayotgani tufayli hukumat ushbu qonunga o‘zgartirish kiritib, ularga davolanish xarajatlarining bir qismini qoplatish niyatida.

Sutka davomida 49 kishi sog‘ayib, tuzalganlarning umumiy soni 12 866 nafarga yetdi. Virus qurbonlari soni o‘zgarmagan, 298 kishini tashkil qilmoqda.