Тожикистон стратегик тадқиқотлар маркази директори Хуршид Зиёий мамлакатда янги турдаги коронавирус пандемияси бошқа давлатларга нисбатан фожиавий кечмаганини қайд этди. Бу ҳақда Asia-Plus хабар қилган.
Унинг сўзларига кўра марказ пандемиянинг мамлакатдаги турли соҳаларга таъсирини ўрганган ва бу борадаги таклифларини ҳукуматга киритган.
Зиёийнинг айтишича, коронавируснинг тарқалиши Тожикистонда ҳукумат ва соғлиқни сақлаш вазирлиги томонидан вақтида кўрилган чоралар, аҳолининг хавфдан огоҳ бўлиб, эҳтиёткор бўлгани туфайли фожиавий тарзда кечмаган.
«Учинчи сабаб бу – бизнинг об-ҳаво шароитимиз, қуёшнинг ультрабинафша нурлари ҳар қандай вирусни йўқ қилишга қодир. Кўпинча «Гап қуёш нурида бўлса нима учун Саудия Арабистонида вирус йўқ бўлиб кетмади?», деб савол беришади. Мен у ерда уч йил таржимон бўлиб ишлаганман ва уларнинг осмонида доимий равишда қум чанглари бўлишини, бу қуёшнинг ультрабинафша нурларини тўсиб қўйишини яхши биламан. Коронавирусни иссиқлик эмас, ультрабинафша нурлар йўқ қила олади», – деган Зиёий.
Зиёийнинг қайд этишича, марказ шаҳарларда йўналишли такси транспортлари сонини камайтириб, автобусларни кўпайтиришни таклиф қилган. Унинг фикрича, автобуслар ижтимоий масофаланишга амал қилиш учун қулайроқ транспорт.
Зиёий тадқиқот ҳақидаги қолган тафсилотларни ошкор этмаган ва марказ расмий тақдимотида барчаси ҳақида эълон қилишини айтиб ўтган.
Айни вақтда дунёнинг бошқа давлатларида ҳам, ЖССТ тавсияларида ҳам қуёшнинг ультрабинафша нурлари COVID-19’ни йўқ қилиши ҳақида маълумотлар мавжуд эмас.
2020 йил 25 июль ҳолатига кўра, Тожикистонда 7104 нафар кишида коронавирус инфекцияси аниқланган, 58 киши COVID-19 қурбонига айланган, 5851 бемор касалликдан соғайган.
Изоҳ (0)