Moskvada Qurbon hayiti namozi faqat jome masjidida o‘qiladi. Unda faqatgina diniy idora vakillari ishtirok etishi belgilangan. Bu haqda Rossiya musulmonlari diniy idorasi Ulamolar kengashi qarorida keltirilgan.
“Yangi turdagi koronavirus infeksiyasi xavfi sabab Moskvadagi jome masjidida bayram namozi imomlar, muazzinlar va muftiy o‘rinbosarlari ishtirokida o‘qiladi. Boshqa masjidlarda, shuningdek, musulmonlarning mahalliy diniy tashkilotlarida bayram namozini o‘tkazish tavsiya etilmaydi”, — deyiladi xabarda.
Musulmonlar diniy idorasi tarkibiga kiruvchi Mintaqaviy musulmonlar diniy boshqarmalari hududdagi epidemiologik vaziyatdan kelib chiqib bayram namozlarini o‘tkazish bo‘yicha qarorlarni mustaqil qabul qiladi.
Ulamolar kengashi barcha musulmonlarga onlayn rejimda muftiyning bayram va’zini eshitish va u tugashi bilan mustaqil bayram namozini o‘qish tavsiya qilingan. “An’anaviy ravishda ‘Rossiya 1’ federal kanali orqali Rossiya musulmonlari diniy idorasi raisi, muftiy shayx Ravil Gaynutdinning va’zini tinglash mumkin”, — deyiladi xabarda.
Avvalroq O‘zbekiston musulmonlari idorasi Misrdagi “Dorul Ifto” fatvo hay’atiga tayanib, Qurbon hayitining birinchi kuni 31-iyulga to‘g‘ri kelishini ma’lum qilgandi. O‘zbekiston Prezidentining tegishli qaror bilan mamlakatda Qurbon hayiti 31-iyul kuni nishonlanadi. Ammo mamlakatdagi vaziyat sabab O‘zbekiston musulmonlari idorasi pandemiya vaqtida Qurbon hayiti namozi musulmonlar zimmasidan soqit bo‘lganini ma’lum qilib, musulmonlarga o‘z xonadonlarida to‘rt rakatli nafl namozini o‘qish tavsiya etildi.
Izoh (0)