Xitoylik diplomatlar Xyustondagi konsullik binosini tark etdi

Xitoylik diplomatlar Xyuston shahridagi Xitoy konsulligi binosini bo‘shatib berdi, deb yozadi Associated Press.

Ma’lumotlarga ko‘ra, diplomatik raqamlarga ega yuk mashinalari 24-iyul kuni mahalliy vaqt bilan soat 16:00 dan konsullik binosidan chiqib ketgan.

Reuters’ning aniqlik kiritishicha, AQShda mahalliy vaqt bilan soat 16:00 da Xitoy vakolatxonasini yopish to‘g‘risidagi qaror kuchga kirgach, konsullik binosi atrofida bir necha kishi to‘planib, bino orqa eshigini buzib kirishga uringan.

Agentlik ma’lumotlariga ko‘ra, odamlar orasida AQSh davlat departamenti xodimi, xorijiy ishlar bo‘limi boshlig‘i Kliff Sigrovs ham bo‘lgan. Ular konsullik binosiga kirgach, eshik ostida AQSh davlat departamentining Diplomatik xavfsizlik byurosi qo‘riqchilari paydo bo‘lgan.

Amerika hukumati Xyustondagi diplomatik missiyani yopishni 22-iyul kuni talab qilgan edi. Buning uchun Amerika hukumati Pekinga 72 soat vaqt bergan. Reuters’ning ma’lum qilishicha, Pekin bu kabi harakatga javoban AQShning Uxandagi konsulligini yopish imkoniyatlarini ko‘rib chiqmoqda.

24-iyul kuni Xitoy TIV javob choralari sifatida Chendu shahridagi AQSh bosh konsulxonasi yopilishini ma’lum qilgan.