Toshkent shahridagi Virusologiya ilmiy-tadqiqot instituti direktori va Sog‘liqni saqlash vazirligi bosh infeksionisti Erkin Musaboyev “Gazeta.uz”ga bergan intervyusida COVID-19 qurbonlari soni nima sababdan o‘sayotganiga izoh berdi.
“Gazeta.uz” tomonidan Erkin Musaboyevga koronavirus qurbonlari nima sababdan so‘nggi haftada ko‘paya boshlagani haqida savol berilgan.
“Keling, hisoblaylik. Hozir vafot etganlar soni 27 kishi (“Gazeta.uz” intervyuni 2-iyul kuni e’lon qilgan). Bemorlarning soni esa kundan kunga qanchaga ko‘paymoqda? O‘rtacha 200-250 nafar. Bunga qadar har kuni 40, 50, 100 nafarga ko‘payib borgan. Tuzalib ketganlar soni 5800 nafardan oshgan, o‘lganlar — 27 kishi. Bu, taxminan, 0,5 foiz atrofida. Bu juda yaxshi ko‘rsatkich”, — degan Sog‘liqni saqlash vazirligi bosh infeksionisti.
Uning qayd etishicha, imkon qadar barcha kasalxonaga yotqiziladi. Erkin Musaboyev agar barcha kasallanganlarni kasalxonaga yotqizishda davom etilsa, qanday holat yuz berishi mumkinligi haqida gapirgan.
“Aytaylik, biz budjetdan bir tiyin olmaymiz, yangi kasalxonalar ochmaymiz. Misol qilib, bizning Virusologiya ilmiy-tadqiqot instituti kasalxonasini olsak. Bizda yiliga 3000 ga yaqin jigar sirrozi bilan og‘rigan bemorlar davolanadi. Sirrozni butunlay davolash mumkin emas. Agar davolanishni har chorakda yoki olti oyda bir marta o‘tkazmasak, unda odam o‘rtacha 5-6 yil yashaydi. Agar biz uni to‘g‘ri yo‘naltirsak, umrini 15 yilga uzaytiramiz. Bu yaxshi natija. Agar u moliyaviy imkoniyatlarga ega bo‘lsa, u jigarni qisman transplantatsiya qilishi mumkin, butunlay emas.
Bilasizki, to‘rtinchi oy davomida bizning klinikamiz karantinga yopilgan. Bir yilda jigar sirrozi bilan og‘rigan 3000 nafar bemorni qabul qilsak, demak hozirgacha bizning ixtisoslashgan bo‘limimiz butun respublika bo‘ylab deyarli 1000 nafar bemorni qabul qila olmadi. O‘rtacha 1000 nafar bemor shu payt davomida davolana olmadi. Taxmin qilishimcha, shu vaqt ichida 200 ga yaqin bemor COVID-19’dan emas, balki sirrozdan vafot etdi,” — deya so‘zini davom ettirdi klinika rahbari.
Uning qayd etishicha, agar klinika koronavirus bilan og‘rigan barcha bemorlarni qabul qilishni davom ettirsa, keyingi bosqichda kardiologiya markazini yopish kerak bo‘ladi. Qanchadan-qancha bemorlar COVID-19’dan emas, balki yurak xurujidan vafot etadi. “Keyin biz yana qandaydir boshqa klinikani yopamiz, tug‘ruqxonani yopamiz, sharoitlar keskin yomonlashadi, keyin esa shunchaki tug‘ruq paytida o‘lishni boshlashadi. Aynan shu hodisa Italiyada va boshqa mamlakatlarda sodir bo‘lgan — bu sog‘liqni saqlash tizimining falajlanishi”, — deydi shifokor.
“Bemorlar unchalik ko‘p bo‘lmagan davrda biz klinikalarni yopib bo‘lsa ham davolash ishlarini olib bordik. Yana bizning Virusologiya ilmiy-tadqiqot institutidagi klinikamizning misolida — mamlakatda 25 kishi koronavirusdan vafot etgan bo‘lsa, aytganimdek, jigar sirrozidan to‘liq davolana olmaganligi sababli vafot etganlar soni — 10 baravar ko‘proq”, — deya shifokor koronavirusning bilvosita qurbonlari soni ko‘pligini aytib o‘tgan.
Erkin Musaboyevning so‘zlariga ko‘ra, shifoxona boshqa toifadagi kasallarni qabul qilaversa, vaziyat shunaqa bo‘ladi. Bular COVID-19 pandemiyasining bilvosita qurbonlari deyiladi.
Shuningdek, ilmiy-tadqiqot instituti direktori 5-iyuldan boshlab koronavirusning yengil va alomatlarsiz shakllari bilan kasallangan bemorlarni uy sharoitida davolash yuzasidan ham o‘z fikrini bildirgan.
Mavzuga doir: O‘zbekistonda 5-iyuldan boshlab koronavirusga chalingan ayrim toifa bemorlar o‘z uyida davolanishi mumkin bo‘ladi
Eslatib o‘tamiz, O‘zbekistonda koronavirusning 19-qurboni 10-iyun kuni qayd etilgandi. Shundan so‘ng, 25-iyunga kelib navbatdagi o‘lim holati rasman e’lon qilindi. Keyingi kunlarda koronavirusdan vafot etish ko‘rsatkichi osha boshladi. 28-iyun kuni 2 ta, 29-iyun kuni yana 2 ta va 30-iyun kuni ham 2 ta o‘lim qayd etildi. 1-iyul kuni bir kishi kasallik qurboniga aylangan bo‘lsa, bir kunlik tanaffusdan keyin 3-iyul kuni kasallikning 28-qurboni haqida xabar berildi.
Izoh (0)