Surxondaryo viloyati Denov tumani hokimi Baxtiyor Ibatov 21-iyun kuni tuman aholisiga murojaat qilib, tumanning bir fuqarosi 20-iyun kuni koronavirusdan vafot etganini ma’lum qilgani, Ibatov chiqishi tasvirlangan videolavha Denov tumani hokimligining Telegram’dagi kanalida e’lon qilinib, so‘ngra o‘chirib tashlangani to‘g‘risida xabar berilgandi. Sog‘liqni saqlash vazirligining ma’lum qilishicha, Denov shahrida vafot etgan bemorda koronavirus infeksiyasi tasdiqlangan.

Ma’lum bo‘lishicha, Denov shahrida yashagan, 1961-yilda tug‘ilgan marhum bemor B.X. so‘nggi 5 yildan buyon o‘pkaning ikki tomonlama o‘tkir bronxopnevmoniyasi tashxisi bilan davolanib kelgan. Shu yilning 19-iyun kuni bemor (ayol) murojaatiga ko‘ra, olingan namunada koronavirus infeksiyasi mavjudligiga gumon qilingan va bemor tez yordam mashinasida tuman yuqumli kasalliklar shifoxonasiga yotqizilgan.

Shifoxonada bemorga ikki tomonlama o‘tkir bronxopnevmoniya, o‘tkir yurak va o‘pka yetishmovchiligi og‘ir darajasi, koronavirus infeksiyasiga gumon tashxisi qo‘yilgan. Bundan tashqari, bemorda o‘pkaning surunkali obstruktiv kasalligi, surunkali piyelonefrit, kamqonlikning o‘rta og‘ir darajasi tashxisi ham qo‘yilgan.

Bemorga ko‘rsatilgan tezkor tibbiy yordam va reanimatsion muolajalarga qaramasdan, u yurak-qon tomir va o‘pka yetishmovchiligidan vafot etgan.

Respublika sanitariya-epidemiologik osoyishtaligi agentligining maxsus referens laboratoriyasi xulosasiga ko‘ra, marhumdan olingan namunada koronavirus infeksiyasi tasdiqlangan. U bilan muloqotda bo‘lgan oila a’zolari, yaqinlari va boshqa fuqarolar qat’iy karantinga olingan bo‘lib, ushbu holat yuzasidan epidemiologik surushtiruv ishlari olib borilmoqda.

Eslatib o‘tamiz, 15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. 19-bemorning vafoti haqida 10-iyun kuni xabar berilgandiKitob va Denov tumanlari hokimliklari ham o‘z hududlarida koronavirus oqibatida bir nafardan bemor hayotdan ko‘z yumgani haqida xabar qilgan. Lekin Sog‘liqni saqlash vazirligi ushbu holatlarni tasdiqlamay, qurbonlar soniga o‘zgartirish kiritmay kelayotgan edi.

O‘zbekistonda 25-iyun soat 10:00 holatiga ko‘ra, koronavirus infeksiyasi qayd etilganlar soni 6990 kishini tashkil etmoqda. Hozirga qadar mamlakatda koronavirus infeksiyasiga chalingan 4685 nafar fuqaro (68 foiz) sog‘aygan.