Markaziy harbiy okrugiga qarashli Samarqand viloyatidagi “Sazagan” dala o‘quv maydoni foydalanishga topshirildi. Bu haqda okrug matbuot xizmati xabar berdi.
Ma’lum qilinishicha, ushbu dala o‘quv maydonining ochilish marosimida O‘zbekiston mudofaa vaziri general-mayor Bahodir Qurbonov, Samarqand viloyati hokimi — harbiy-ma’muriy sektor rahbari Erkinjon Turdimov, Markaziy harbiy okrug qo‘shinlari qo‘mondonligi, Mudofaa vazirligi faxriylari, davlat va jamoat tashkilotlari vakillari hamda yoshlar ishtirok etdi.
Marosimda “Sazagan” dala o‘quv maydonining qurilishida jonbozlik ko‘rsatgan bir guruh harbiy xizmatchilar hamda quruvchi-pudratchi tashkilot vakillari Mudofaa vazirligi va Samarqand viloyati hokimi tomonidan rag‘batlantirildi.
Shundan so‘ng mudofaa vaziri boshchiligida tadbir ishtirokchilari yangidan barpo etilgan dala o‘quv maydonida yaratilgan shart-sharoitlar, o‘quv sinflari, tibbiyot punkti, yotoqxonalar, oshxona, sport shaharchasi hamda jangovar texnikalar parkini ko‘zdan kechirdi.
Mehmonlar dala o‘quv maydonini kuzatish davomida Markaziy harbiy okrugi harbiy xizmatchilari tomonidan yaratilgan qo‘shinlar jangovar shayligini oshirishga xizmat qiladigan innovatsion ishlanmalar bilan tanishdi.
Shuningdek, “Sazagan” dala o‘quv maydonida zamon talablariga javob beradigan 30 ga yaqin o‘quv nuqtalarda barcha turdagi jangovar texnika va qurollardan foydalangan holda ko‘rgazmali jangovar o‘quv-mashg‘ulotlari o‘tkazilib, tadbir ishtirokchilariga namoyish etildi.
Eslatib o‘tamiz, Qurolli Kuchlar bo‘yicha eng ixcham hamda harbiy amaliy mashg‘ulotlar olib borishda o‘quv joylarining keng qamrovligi jihatidan Samarqand garnizonidagi “Sazagan” poligonining rasman ochilish marosimi 2020-yilning 14-mart kuniga rejalashtirilgandi.
Izoh (0)