Andijon viloyatining Paxtaobod tumanida asab-ruhiy kasalliklar shifoxonasida ro‘yxatda turgan ayol bilan tanishib, yaqin munosabatda bo‘lgan hamda ayolning uy-joyni sotishdan tushgan ikki ming dollarni qaytarmaslik uchun uni o‘ldirgan fuqaro 17 yilga qamaldi. Bu haqda Jinoyat ishlari bo‘yicha Andijon viloyat sudiga tayanib, “Daryo” muxbiri Umidjon Mamarasulov xabar berdi.
Jinoyat ishlari bo‘yicha Andijon viloyat sudi sudya katta yordamchisi Komronshoh Rasulovning aytishicha, sudlanuvchi T.P. 2018-yilning fevral oyida Paxtaobod tumanida yashovchi aqli zaif ayol E.L. bilan tanishib, uning marhum turmush o‘rtog‘idan qolgan uy-joyini sotishdan tushgan ikki ming dollarni unga qaytarmaslik maqsadida 2018-yilning sentabr oyiga qadar fuqaro bilan yaqin munosabatda bo‘lib kelgan.
“Sentabr oyi oxirlari edi. E.L. uyimga kelib, undan olgan pullarni qaytarib bermaganim uchun IIBga yozib berganini, shu sababli IIB meni chaqirayotganini aytdi. Shunda so‘ng u bilan birga aytilgan joyga bordik. Borgan paytimizda profilaktika inspektori kelmagan ekan. Ularni binoning qarama-qarshi tomonida 5-10 daqiqa kutdik. Shu paytda E.L.ga Andijon shahridan ijaraga uy topib berishimni aytdim va ishontirdim. Keyin u bilan birga yo‘lovchi mashinada Andijon avtovokzaliga bordik. U yerdan mikroavtobusga chiqib, Yozyovon tumani markazidagi aylanma yo‘lgacha keldik. Mashinadan tushib qolgach, aylanma yo‘ldan Qo‘qon shahriga qarab yuruvchi asosiy yo‘l bo‘ylab, yetti-sakkiz soat piyoda gaplashib ketdik. Dam olish uchun yo‘lning o‘ng tomonida joylashgan qarovsiz qumli joyga o‘tdik. O‘tirmoqchi bo‘lganimizda, u boshidagi ro‘molini yechdi. Men undan ro‘molini so‘rab oldim va ro‘mol bilan bo‘ynidan bo‘g‘ib, o‘zimga tortdim va ikki-uch daqiqa ushlab turdim. O‘lganiga ishonch hosil qilgach, jinoyatni yashirish maqsadida bir metr chuqur kovlab, jasadni yerga ko‘mib, uyimga qaytib keldim”, — deydi sudlanuvchi.
Aniqlanishicha, 2018-yilning sentabrida o‘ldirilgan ayol ikki oydan so‘ng qidiruvga berilgan. Topilmagach, u bilan yaqin munosabatda bo‘lgan va birga yashagan P.T.dan gumonlanib, ayolning o‘limi yuzasidan jinoyat ishi qo‘zg‘atilgan. 2020-yil yanvar oyida marhumning jasadi topilib, jinoyat fosh etilgach, P.T. qamoqqa olingan.
2020-yilning 29-iyun kuni sudya Ulug‘bek Karimov raisligida bo‘lib o‘tgan sud majlisida P.T. Jinoyat kodeksining 97-moddasi 2-qismi “j”, “i” bandlari (Tamagirlik niyatida o‘ta shafqatsizlik bilan qasddan odam o‘ldirish) bilan aybli deb topilgan va 17 yilga ozodlikdan mahrum qilingan.
Izoh (0)