Barchasini to‘plasa bir grammga ham bormaydigan virus bugun dunyoni titratdi va millionlab xabarlarning bosh mavzusiga aylandi, jahon siyosatida burilish yasadi. Jumladan, O‘zbekistonni qisqa muddatda qanchalik o‘zgartirganini dayjestimizda bayon qilamiz.
Mavzuga doir:
- Koronaxabarlar, karantin, misli ko‘rilmagan choralar, tashvish va xavotirlar. O‘zbekistonda koronavirusning birinchi haftasi dayjesti
- O‘zbekiston bo‘ylab tarqalayotgan koronavirus, to‘xtatilgan transportlar, yopilgan postlar, besh kunda bitkazilgan shifoxona. O‘zbekistonda koronavirusning ikkinchi haftasi dayjesti
- Koronavirusning uchinchi haftasi dayjesti: Kuchaygan karantin, xayriya xavotiri, cheklovlar: >65 yosh; <2 metr; >37 daraja
- O‘zbekistonda koronavirusning to‘rtinchi haftasi dayjesti: O‘zimizning testlar va tibbiy ventilyator, xayr Anvar Obidjon, bobodehqondan umidlar
- O‘zbekistonda koronavirusning beshinchi haftasi dayjesti: Shiddat bilan tarqalgan virus, postdagi qurolli harbiylar, o‘zimizning “aqlli niqob”imiz, yakka-yakka iftorlik
***
Virus tarqalishiga qarshi eng yaxshi chora karantin. Biroq karantindan karaxt bo‘lgan iqtisodiyot bilan uzoqqa bora olamizmi? O‘zbekistonda bir qator sohalarga karantin talablari asosida faoliyatini qayta tiklashga ruxsat etildi. Bu sohalarga qurilish materiallari bozorlari, yirik ishlab chiqaruvchi subyektlarning do‘konlari, hunarmand ustalar do‘konlari, urug‘ va ko‘chat yetishtiruvchilar, tijorat banklarining hududlardagi shoxobchalari, mashina “zapchast”i bilan savdo qiluvchilar, avtomobillar, qishloq xo‘jaligi va qurilish texnikalariga servis xizmat ko‘rsatuvchilar, kimyoviy tozalash bilan shug‘ullanuvchi tadbirkorlik subyektlari, notarial idoralar, sug‘urta kompaniyalari va boshqalar kiradi. Demak, asta-sekinlik bilan to‘laqonli hayot tarziga qadam tashlayapmiz.
***
Koronavirusga oid xabarlar orasida kundan kunga sog‘ayotganlar soni oshayotgani kishini xursand qiladi. Buxoro viloyatidan bir yo‘la 50 nafar bemor to‘liq sog‘aydi. Toshkent va Xorazmda 18 nafar, undan oldingi kuni Qoraqalpog‘istonda 10 nafar bemor sog‘aygandi. Ularning aksariyati Rossiya, Turkiya kabi davlatlardan charter reysda olib kelinib, karantinga olinganlardir. Shunday qilib, COVID-19 dan tuzalgan yurtdoshlarimiz soni 765 nafarga yetdi. Ayni vaqtda 1 096 nafar yurtdoshimiz davolanishda. Telegram’dagi oxirgi ikki oyda faollashgan SSV matbuot kotibi kanalining axborotiga tayansak, dunyo mamlakatlarida COVID-19 ga chalingan bemorlarning o‘lim ko‘rsatkichi bo‘yicha O‘zbekiston juda ham past (1 million aholiga nisbatan 0,2 foiz) ko‘rsatkichni qayd qilmoqda.
***
Karantin choralarini bosqichma-bosqich yumshatishni respublikamizda Qashqadaryo va Farg‘ona viloyatlari boshlab beradi. Karantin davrida Farg‘onada 10 ming, Qashqadaryoda 11 ming korxonaning ishlab chiqarish ko‘rsatkichlari keskin kamaydi. Ishsizlar ortdi, qolaversa, Farg‘onada 56 mingta, Qashqadaryoda 91 mingta ehtiyojmand oila mavjud. Joriy yilda bu ikki viloyatga qurilish va rekonstruksiya ishlari uchun bir trillion so‘mdan ortiqroq mablag‘ ajratildi, ammo birinchi chorakdayoq mablag‘ o‘zlashtirish ancha orqada qolib ketdi. Prezident aholi bandligini ta’minlash uchun qurilishlarni davom ettirishga ruxsat berilganini inobatga olib, bu ikki viloyatdagi obyektlarda belgilangan ishlarni jadallashtirish zarurligini ta’kidladi.
Ushbu viloyatlar hokimlariga mavjud bog‘ va tokzorlar qator oralariga to‘liq ekin ekilishini tashkil qilish, shu orqali aholi bandligini ta’minlash vazifasi qo‘yildi. Foydalanishdan chiqqan va lalmi yerlarda quduq qazib, aholiga bo‘lib berish zarurligi qayd etildi. Buning uchun Farg‘onaga 15 milliard so‘m, Qashqadaryoga 11 milliard so‘m ajratildi. Kam ta’minlangan oilalarga qoramol, parranda va asalari uyasi tarqatib, kooperatsiya asosida aholi bandligini ta’minlash, mahsulot yetishtirishni ko‘paytirish bo‘yicha topshiriqlar berildi.
***
Karantin sababli qiyin ahvolga tushib qolgan yurtdoshlarimizga yordam berish tashabbusi Ziroat Mirziyoyeva raisligidagi vasiylik kengashi tomonidan ilgari surildi. Ziroat Mirziyoyeva raisligidagi “Zamin” fondi yordamga muhtoj besh ming ayolga besh milliard so‘m mablag‘ ajratdi. Jamg‘arma saytida jismoniy va yuridik shaxslarning xayriya badallari, shuningdek, xalqaro tashkilotlarning grantlari “Zamin” fondi mablag‘ini shakllantirishning asosiy manbalari hisoblanishi umumiy shaklda yozilgan, biroq to‘la axborot keltirilmagan.
Yozilishicha, “Zamin” xalqaro jamoat fondiga nodavlat notijorat tashkiloti sifatida O‘zbekistonda asos solindi. Fondning maqsadi — mamlakatning barqaror rivojlanishiga hissa qo‘shish va aholi turmush darajasini oshirish.
***
Hafta bahsi gazetalar kelajagi haqida bo‘ldi. Milliy mass-mediani qo‘llab-quvvatlash va rivojlantirish jamoat fondi vasiylik kengashi raisi Komil Allamjonov “Fikrimcha, matbuot ham og‘ir jarayonlar va og‘ir davrga kirib kelmoqda. Gazeta nashrlariga keladigan bo‘lsak, qo‘pol qilib aytgim kelmayapti, ammo men ularning kelajagini ko‘rmayapman. Bu inqirozlar boshlanmagan taqdirda ham gazetalar allaqachon o‘tmishga aylangandi”, deyishi shundoq ham qiyinchilikda kun ko‘rayotgan bosma nashrlar vakillarini junbushga keltirdi. Ular Allamjonovning fikrini turli-tuman tanqid ostiga oldi. Bahsdan umumiy xulosa sifatida aytish zarurki, matbuot uchun bosma nashr zaruriyati yo‘q emas, biroq O‘zbekistondagi bosma nashrlar ham zamon talabiga moslashishi kerak.
Eslatib o‘tamiz 2020-yil 26-aprel soat 18:00 holatiga ko‘ra, O‘zbekistonda koronavirus infeksiyasi qayd etilganlar soni 1 869 nafarni tashkil qilmoqda. “Daryo”ni kuzatishdan to‘xtamang. Uyda qoling.
Izoh (0)