Avval xitoylik konsultantlar va tibbiyot xodimlaridan iborat delegatsiyaning O‘zbekistonga kelgani va ularning koronavirusga qarshi kurashda o‘zbekistonlik shifokorlarga yordam berishi haqida xabar berilgandi. Guruh tarkibidagi 9 nafar mutaxassis 20—21-aprel kunlari Farg‘ona viloyatida bo‘ldi. Bu haqda Farg‘ona viloyati sog‘liqni saqlash boshqarmasi xabar qilgan.
Xabarga ko‘ra, delegatsiyani Farg‘ona viloyat hokimi o‘rinbosari Fayzullo Qosimov, viloyat sog‘liqni saqlash boshqarmasi boshlig‘i Odiljon Umarov va boshqa mutasaddi rahbarlar kutib olgan.
Dastlab viloyat sog‘liqni saqlash boshqarmasi konferensiya zalida xitoylik mutaxassislar bilan muloqot o‘tkazilgan, unda viloyat sog‘liqni saqlash boshqarmasi boshlig‘i mehmonlarga koronavirus pandemiyasi bilan bog‘liq hududdagi vaziyat, karantin va davolash-profilaktika choralari haqida ma’lumot bergan.
Shundan so‘ng Farg‘ona viloyati yuqumli kasalliklar shifoxonasi shifokorlari va xitoylik mutaxassislar onlayn videosuhbat o‘tkazgan. Muloqot jarayonida farg‘onalik shifokorlar COVID-19 aniqlangan bemorlarni davolash masalasida xitoylik hamkasblari bilan o‘zaro tajriba almashgan. Xitoylik mutaxassislar o‘z tajribalaridan kelib chiqib zarur tavsiyalarni bergan.
Masalan, Farg‘ona viloyati yuqumli kasalliklar shifoxonasi bosh shifokori S.Boyyigitov quyidagicha savol bilan murojaat qildi:
“1988-yilda tug‘ilgan ayolda 20-mart kuni COVID-19 aniqlanib, shifoxonamizga yotqizilgan. Virus va infeksiyaga qarshi barcha zarur muolajalar standart asosida olib borilmoqda. Bemor o‘zini yaxshi his qilib, unda kasallikning klinik belgilari va boshqa asoratlari sezilgani yo‘q. Ammo oradan bir oy vaqt o‘tsa-da, bemordan olingan qon tahlillari natijasi musbat chiqmoqda. Xitoyda ham shu kabi holat uchraganmi? Uchragan bo‘lsa qanday davo choralari ko‘rilgan?”
Xitoylik mutaxassislarning ma’lum qilishicha, Uxan tajribasida ham bunday holat uchragan, ba’zan virus kasallangan odam qonida 50 kungacha saqlanib turishi mumkin. Xorijlik mutaxassislar bu bemor shifoxonada yana bir necha kun yotib davolanishi zarurligini tavsiya qildi.
Shuningdek, farg‘onalik mutaxassislarning “Agar emizikli ayol va uning chaqalog‘ida virus aniqlangan bo‘lsa, chaqaloq onasining ko‘krak sutidan oziqlanishi xavfli emasmi? Xitoyda bu borada qanday yo‘l tutilmoqda?” degan savollariga xitoylik konsultantlar:
“Ona shaxsiy gigiyena qoidalariga qat’iy amal qilgan holda chaqalog‘ini emizishda davom etsa bo‘ladi”, degan mazmunda javob qaytardi.
Shundan so‘ng Respublika shoshilinch tibbiy yordam ilmiy markazi Farg‘ona filiali majlislar zalida xitoylik mutaxassislar va farg‘onalik shifokorlar ishtirokida “Shifoxonada infeksiyaning oldini olish” mavzusida mahorat darsi tashkil etildi.
Mahorat darsida xitoylik shifokorlar shaxsiy himoya kiyimlarini to‘g‘ri kiyish va yechish, bemorlarning oldida qanday harakatlanish zarurligi haqida ko‘rgazmali mashg‘ulot namoyish qildi.
21-aprel kuni xitoylik shifokorlar viloyatdagi bir qator davolash-profilaktika muassasalarida tashkil etilgan zaxira karantin markazlarida yaratilgan shart-sharoitlarni ko‘zdan kechirdi.
Ular bu yerdagi sharoitga ijobiy baho berib, o‘z tajribalaridan kelib chiqib bir qator tavsiyalarni ham berdi. Masalan, xonalardagi havoni tozalab turuvchi havo yo‘llarini vaqtinchaga yopib qo‘yish hisobiga virus tarqalishining oldini olish mumkinligi, xonani esa faqat derazalarni ochish orqali shamollatish kerakligi haqida gapirildi. Xitoy tajribasida bir xonada yotgan bemor odam nafas olganida chiqqan viruslar havo yo‘li orqali yuqori qavatdagi boshqa sog‘lom bemorga yuqish holati ham uchragani aytildi. Shuningdek, binolarni dezinfeksiya qilish borasida ham muhim tavsiyalar berildi, deyiladi Farg‘ona sog‘liqni saqlash boshqarmasining xabarida.
Mavzuga doir:
Izoh (0)