Барчасини тўпласа бир граммга ҳам бормайдиган вирус бугун дунёни титратди ва миллионлаб хабарларнинг бош мавзусига айланди, жаҳон сиёсатида бурилиш ясади. Жумладан, Ўзбекистонни қисқа муддатда қанчалик ўзгартирганини дайжестимизда баён қиламиз.
Мавзуга доир:
- Коронахабарлар, карантин, мисли кўрилмаган чоралар, ташвиш ва хавотирлар. Ўзбекистонда коронавируснинг биринчи ҳафтаси дайжести
- Ўзбекистон бўйлаб тарқалаётган коронавирус, тўхтатилган транспортлар, ёпилган постлар, беш кунда битказилган шифохона. Ўзбекистонда коронавируснинг иккинчи ҳафтаси дайжести
- Коронавируснинг учинчи ҳафтаси дайжести: Кучайган карантин, хайрия хавотири, чекловлар: >65 ёш; <2 метр; >37 даража
- Ўзбекистонда коронавируснинг тўртинчи ҳафтаси дайжести: Ўзимизнинг тестлар ва тиббий вентилятор, хайр Анвар Обиджон, бободеҳқондан умидлар
- Ўзбекистонда коронавируснинг бешинчи ҳафтаси дайжести: Шиддат билан тарқалган вирус, постдаги қуролли ҳарбийлар, ўзимизнинг «ақлли ниқоб»имиз, якка-якка ифторлик
***
Вирус тарқалишига қарши энг яхши чора карантин. Бироқ карантиндан карахт бўлган иқтисодиёт билан узоққа бора оламизми? Ўзбекистонда бир қатор соҳаларга карантин талаблари асосида фаолиятини қайта тиклашга рухсат этилди. Бу соҳаларга қурилиш материаллари бозорлари, йирик ишлаб чиқарувчи субъектларнинг дўконлари, ҳунарманд усталар дўконлари, уруғ ва кўчат етиштирувчилар, тижорат банкларининг ҳудудлардаги шохобчалари, машина «запчаст»и билан савдо қилувчилар, автомобиллар, қишлоқ хўжалиги ва қурилиш техникаларига сервис хизмат кўрсатувчилар, кимёвий тозалаш билан шуғулланувчи тадбиркорлик субъектлари, нотариал идоралар, суғурта компаниялари ва бошқалар киради. Демак, аста-секинлик билан тўлақонли ҳаёт тарзига қадам ташлаяпмиз.
***
Коронавирусга оид хабарлар орасида кундан кунга соғаётганлар сони ошаётгани кишини хурсанд қилади. Бухоро вилоятидан бир йўла 50 нафар бемор тўлиқ соғайди. Тошкент ва Хоразмда 18 нафар, ундан олдинги куни Қорақалпоғистонда 10 нафар бемор соғайганди. Уларнинг аксарияти Россия, Туркия каби давлатлардан чартер рейсда олиб келиниб, карантинга олинганлардир. Шундай қилиб, COVID-19 дан тузалган юртдошларимиз сони 765 нафарга етди. Айни вақтда 1 096 нафар юртдошимиз даволанишда. Telegram’даги охирги икки ойда фаоллашган ССВ матбуот котиби каналининг ахборотига таянсак, дунё мамлакатларида COVID-19 га чалинган беморларнинг ўлим кўрсаткичи бўйича Ўзбекистон жуда ҳам паст (1 миллион аҳолига нисбатан 0,2 фоиз) кўрсаткични қайд қилмоқда.
***
Карантин чораларини босқичма-босқич юмшатишни республикамизда Қашқадарё ва Фарғона вилоятлари бошлаб беради. Карантин даврида Фарғонада 10 минг, Қашқадарёда 11 минг корхонанинг ишлаб чиқариш кўрсаткичлари кескин камайди. Ишсизлар ортди, қолаверса, Фарғонада 56 мингта, Қашқадарёда 91 мингта эҳтиёжманд оила мавжуд. Жорий йилда бу икки вилоятга қурилиш ва реконструкция ишлари учун бир триллион сўмдан ортиқроқ маблағ ажратилди, аммо биринчи чоракдаёқ маблағ ўзлаштириш анча орқада қолиб кетди. Президент аҳоли бандлигини таъминлаш учун қурилишларни давом эттиришга рухсат берилганини инобатга олиб, бу икки вилоятдаги объектларда белгиланган ишларни жадаллаштириш зарурлигини таъкидлади.
Ушбу вилоятлар ҳокимларига мавжуд боғ ва токзорлар қатор ораларига тўлиқ экин экилишини ташкил қилиш, шу орқали аҳоли бандлигини таъминлаш вазифаси қўйилди. Фойдаланишдан чиққан ва лалми ерларда қудуқ қазиб, аҳолига бўлиб бериш зарурлиги қайд этилди. Бунинг учун Фарғонага 15 миллиард сўм, Қашқадарёга 11 миллиард сўм ажратилди. Кам таъминланган оилаларга қорамол, парранда ва асалари уяси тарқатиб, кооперация асосида аҳоли бандлигини таъминлаш, маҳсулот етиштиришни кўпайтириш бўйича топшириқлар берилди.
***
Карантин сабабли қийин аҳволга тушиб қолган юртдошларимизга ёрдам бериш ташаббуси Зироат Мирзиёева раислигидаги васийлик кенгаши томонидан илгари сурилди. Зироат Мирзиёева раислигидаги «Замин» фонди ёрдамга муҳтож беш минг аёлга беш миллиард сўм маблағ ажратди. Жамғарма сайтида жисмоний ва юридик шахсларнинг хайрия бадаллари, шунингдек, халқаро ташкилотларнинг грантлари «Замин» фонди маблағини шакллантиришнинг асосий манбалари ҳисобланиши умумий шаклда ёзилган, бироқ тўла ахборот келтирилмаган.
Ёзилишича, «Замин» халқаро жамоат фондига нодавлат нотижорат ташкилоти сифатида Ўзбекистонда асос солинди. Фонднинг мақсади — мамлакатнинг барқарор ривожланишига ҳисса қўшиш ва аҳоли турмуш даражасини ошириш.
***
Ҳафта баҳси газеталар келажаги ҳақида бўлди. Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжонов «Фикримча, матбуот ҳам оғир жараёнлар ва оғир даврга кириб келмоқда. Газета нашрларига келадиган бўлсак, қўпол қилиб айтгим келмаяпти, аммо мен уларнинг келажагини кўрмаяпман. Бу инқирозлар бошланмаган тақдирда ҳам газеталар аллақачон ўтмишга айланганди», дейиши шундоқ ҳам қийинчиликда кун кўраётган босма нашрлар вакилларини жунбушга келтирди. Улар Алламжоновнинг фикрини турли-туман танқид остига олди. Баҳсдан умумий хулоса сифатида айтиш зарурки, матбуот учун босма нашр зарурияти йўқ эмас, бироқ Ўзбекистондаги босма нашрлар ҳам замон талабига мослашиши керак.
Эслатиб ўтамиз 2020 йил 26 апрель соат 18:00 ҳолатига кўра, Ўзбекистонда коронавирус инфекцияси қайд этилганлар сони 1 869 нафарни ташкил қилмоқда. «Дарё»ни кузатишдан тўхтаманг. Уйда қолинг.
Изоҳ (0)