Hindistonning Xaryan shtati, Faridobod shahrida Surajkund Mela — dunyoning eng yirik hunarmandchilik festivalining tantanali ochilish marosimi bo‘lib o‘tdi. Unda O‘zbekiston sherik-mamlakat sifatida ishtirok etmoqda, deya xabar beradi Turizmni rivojlantirish qo‘mitasi.
Tadbirda Hindiston prezidenti Ram Natx Kovind, Xaryan shtati bosh vaziri Manoxar Lal Kxattar, Xaryan va Ximachal Pradesh shtatlari gubernatorlari, diplomatlar, OAV hamda jahonning 40 davlatidan kelgan ishtirokchilar qatnashdi.
Hindiston prezidenti O‘zbekiston pavilyonida to‘xtab, mamlakatning hunarmandchilik va amaliy san’at ekspozitsiyasi bilan yaqindan tanishdi hamda hunardmandlar bilan suhbatlashdi. Surajkund Mela festivali O‘zbekistonning boy madaniyati va an’anaviy san’ati bilan yaqindan tanishish uchun ajoyib imkoniyat bo‘lganini ta’kidladi.
Hindiston Bosh vaziri Narendra Modi o‘zining Twitter’dagi akkauntida O‘zbekistonga ushbu festivaldagi ishtiroki uchun minnatdorchilik bildirdi: “Bugun Hindiston prezidenti Ram Natx Kovind ochib bergan Surajkund Mela festivalida O‘zbekistonni sherik-mamlakat sifatida ko‘rishdan baxtiyorman. O‘zbekiston Prezidenti Shavkat Mirziyoyevga shunday tashabbusni ilgari surayotgani uchun samimiy minnatdorchilik bildiraman, zero bu xislatlar O‘zbekiston va Hindistonni yanada yaqinlashtiradi”, — deb yozilgan surat ostida.
Xaryana shtati vazir o‘rinbosari Vijay Vardxon Hindiston Qo‘qon hunarmandchilik festivalida O‘zbekiston Prezidenti hunarmandchilikni qo‘llab-quvvatlashga yuksak e’tibor qaratayotganiga ishonch hosil qilganini qayd etib, aynan shu jihat Osiyoning eng yirik festivaliga O‘zbekistonni sherik-mamlakat sifatida tanlashga undaganini ma’lum qildi.
Festivalga kelgan O‘zbekiston delegatsiyasi 100 nafarga yaqin kishidan tashkil topgan bo‘lib, undan “Hunarmand” uyushmasi vakillari, amaliy san’at ustalari, O‘zbekistonning barcha hududlari dizayner va zargarlari, shuningdek, Samarqand, Buxoro va Xorazm musiqa-folklor jamoalari hamda oshpazlari o‘rin olgan.
Surajkund Mela festivali 16-fevral kuniga qadar davom etadi. Ilk kunlarda xalq sayllari 100 mingga yaqin kishini qamrab oldi. Dunyoning 40 mamlakati hamda Hindistonning deyarli barcha shtatlari hamda tarixiy, madaniy va turistik hududlari o‘z pavilyonlari bilan ishtirok etmoqda. Festival yakuniga qadar mehmonlar soni 1,5 million kishiga yetishi kutilmoqda.
Izoh (0)