O‘tgan 2019-yilda adliya organlariga 100 mingdan ortiq murojaat kelib tushgan bo‘lib, bu 2018-yilgi ko‘rsatkichdan qariyb ikki barobar ko‘pdir. Ularning 86 mingdan ziyodi hal qilindi, qariyb 57 ming nafar fuqarolarning huquqlari tiklandi.
3-fevral kuni adliya vaziri Ruslanbek Davletov ishtirokida OAV vakillari uchun o‘tkazilgan media tadbirda ta’kidlanishicha, o‘tgan yili o‘zboshimchalik bilan qurilgan uy-joyga nisbatan egalik huquqini e’tirof etish bo‘yicha o‘tkazilgan bir martalik aksiya doirasida 400 mingdan ziyod kadastr hujjati rasmiylashtirilgan. Ya’ni, 400 mingdan ortiq oila o‘z uy-joyiga nisbatan huquqiy kafolatni qo‘lga kiritdi. Ikki oy davomida maxsus aksiya doirasida ikki mingdan ko‘proq murojaat kelib tushgan. Sudlarga 360 ta ariza yuborilib, 30 milliard so‘m miqdorida kompensatsiya talab qilingan. 50 nafar mansabdor shaxs javobgarlikka tortilgan.
“Daryo” muxbirining xabar berishicha, аdliya vaziri Ruslanbek Davletov o‘z nutqida qog‘ozbozlikni kamaytirish masalalariga ham alohida to‘xtalib o‘tgan.
“Mahallalar tomonidan beriladigan ma’lumotnoma juda katta muammo bo‘lib kelgan. Birgina mahalladan 28 ta ma’lumotnoma berilar ekan. Bir yilda 40 millionta ma’lumotnoma berilganligi oydinlashdi. O‘ylab ko‘ringlar, byurokratiya shuncha odamning hayotiga ta’sir qilib kelgan, hammasi bekor bo‘ldi. ‘Mahalladan ma’lumotnoma olib kel’, deb talab qilish mumkin emas. Bitta narsaga e’tibor beringlar, mahalla hech qachon o‘zi bergan ma’lumotnomaga javob bermagan. Qanaqadir tizim shakllanib, biz byurokratiyani ichiga kirib ketgandik. Sekin-sekin bundan chiqish yo‘llarini o‘ylayapmiz. Ruhiy kasalliklar hamda narkologiya dispanserdan yiliga 500 mingta ma’lumotnoma berilar ekan.
Masalan, siz Mo‘ynoqda yashasangiz, Taxiatoshdagi dispanserga kelib, ma’lumotnomani olishingiz kerak. Pul to‘lashingiz lozim, qancha miqdorda pul to‘laysiz, uni hech kim yozmagan. Bu yerda ovoragarchiliklar ko‘p. Hukumat bizni qo‘llab-quvvatladi. Shu yilning 1-mart sanasidan mazkur ma’lumotnoma Davlat xizmatlari markazi orqali beriladigan bo‘lyapti. Oldin 14 ta joydan berilgan bo‘lsa, endi 200 ta tumandan beriladi. Har kim o‘z tumanidan ma’lumotnomasini olishi mumkin.
Ikkinchi tahlilimiz, nega bunday ma’lumotnomalar so‘ralyapti, degan masalani ham oldimizga qo‘yayapmiz. Nimaga hamma tashkilotga borsangiz, o‘nta hujjat, rasm va ma’lumotnoma so‘raydi. Nega rasmni ichki ishlar tizimi, integratsiya orqali o‘zi olmaydi? Hamma rasmga tushib yurishi kerak. Bu narsalar xalq uchun juda qulay bo‘lishi, qiyinchiliklar yaratmasligi kerak”, — dedi Davletov.
Vazirning qo‘shimcha qilishicha, vazirlikka oxirgi ikki yilda huquqiy ekspertizadan o‘tkazish uchun kelib tushgan besh mingdan ortiq loyihaning 10 foizi (527 ta) qonunchilik talablariga javob bermasligi sababli qaytarilgan. Davlat boshqaruvi tizimining samaradorligini tahlil qilish sohasini takomillashtirish yuzasidan jami 92 ta taklif ishlab chiqilgan.
Izoh (0)