Ҳиндистон президенти ва бош вазири Осиёнинг энг йирик ҳунармандчилик фестивалидаги Ўзбекистоннинг иштирокини эътироф этди

Ҳиндистоннинг Харян штати, Фаридобод шаҳрида Surajkund Mela — дунёнинг энг йирик ҳунармандчилик фестивалининг тантанали очилиш маросими бўлиб ўтди. Унда Ўзбекистон шерик-мамлакат сифатида иштирок этмоқда, дея хабар беради Туризмни ривожлантириш қўмитаси.

Тадбирда Ҳиндистон президенти Рам Натх Ковинд, Харян штати бош вазири Манохар Лал Кхаттар, Харян ва Химачал Прадеш штатлари губернаторлари, дипломатлар, ОАВ ҳамда жаҳоннинг 40 давлатидан келган иштирокчилар қатнашди.

Ҳиндистон президенти Ўзбекистон павильонида тўхтаб, мамлакатнинг ҳунармандчилик ва амалий санъат экспозицияси билан яқиндан танишди ҳамда ҳунардмандлар билан суҳбатлашди. Surajkund Mela фестивали Ўзбекистоннинг бой маданияти ва анъанавий санъати билан яқиндан танишиш учун ажойиб имконият бўлганини таъкидлади.

Ҳиндистон Бош вазири Нарендра Моди ўзининг Twitter’даги аккаунтида Ўзбекистонга ушбу фестивалдаги иштироки учун миннатдорчилик билдирди: «Бугун Ҳиндистон президенти Рам Натх Ковинд очиб берган Surajkund Mela фестивалида Ўзбекистонни шерик-мамлакат сифатида кўришдан бахтиёрман. Ўзбекистон Президенти Шавкат Мирзиёевга шундай ташаббусни илгари сураётгани учун самимий миннатдорчилик билдираман, зеро бу хислатлар Ўзбекистон ва Ҳиндистонни янада яқинлаштиради», — деб ёзилган сурат остида.

Харяна штати вазир ўринбосари Вижай Вардхон Ҳиндистон Қўқон ҳунармандчилик фестивалида Ўзбекистон Президенти ҳунармандчиликни қўллаб-қувватлашга юксак эътибор қаратаётганига ишонч ҳосил қилганини қайд этиб, айнан шу жиҳат Осиёнинг энг йирик фестивалига Ўзбекистонни шерик-мамлакат сифатида танлашга ундаганини маълум қилди.

Фестивальга келган Ўзбекистон делегацияси 100 нафарга яқин кишидан ташкил топган бўлиб, ундан «Ҳунарманд» уюшмаси вакиллари, амалий санъат усталари, Ўзбекистоннинг барча ҳудудлари дизайнер ва заргарлари, шунингдек, Самарқанд, Бухоро ва Хоразм мусиқа-фолклор жамоалари ҳамда ошпазлари ўрин олган.

Surajkund Mela фестивали 16 февраль кунига қадар давом этади. Илк кунларда халқ сайллари 100 мингга яқин кишини қамраб олди. Дунёнинг 40 мамлакати ҳамда Ҳиндистоннинг деярли барча штатлари ҳамда тарихий, маданий ва туристик ҳудудлари ўз павильонлари билан иштирок этмоқда. Фестиваль якунига қадар меҳмонлар сони 1,5 миллион кишига етиши кутилмоқда.