Bandlik va mehnat munosabatlari vazirligi 2019-yil paxta yig‘im-terimi mavsumi davomida majburiy mehnatga yo‘l qo‘yganligi sababli ma’muriy jarimaga tortilgan shaxslar ro‘yxatini e’lon qilgan edi. Mazkur ro‘yxatga ko‘ra, Qoraqalpog‘istonning Xo‘jayli tumanidagi 7, 8, 9 va 31-sonli maktab direktorlari majburiy mehnatga yo‘l qo‘ygan va ma’muriy jarimaga tortilgan.
Qoraqalpog‘iston Xalq ta’limi vazirligi matbuot xizmatining xabar berishicha, vazirlikning nazorat-huquqiy xizmati tomonidan mazkur ish o‘rganilib chiqilgan va mehnat-huquq inspektorlari shoshma-shosharlikka yo‘l qo‘ygani aniqlangan. Mehnat-huquq inspektorlari ma’lumotlarni qanchalik majburiy mehnatga taalluqliligini o‘rganmasdan, majburiy mehnat ro‘y bermagan holatlar yuzasidan bayonnomalar rasmiylashtirib, Ma’muriy javobgarlik to‘g‘risidagi kodeksning 51-moddasi 1-qismi bilan ma’muriy javobgarlikka tortish haqida asossiz qarorlar qabul qilgan.
Xo‘jayli tumanidagi 7, 8, 9 va 31-sonli umumta’lim maktab direktorlari mehnat inspektorlari L.Q. va J.K.ning ularga nisbatan eng kam oylik ish haqining 10 baravari miqdorida ma’muriy jarimaga tortish haqidagi qarorlaridan norozi bo‘lib, Xo‘jayli tumani ma’muriy sudiga murojaat qilgan.
Xo‘jayli tumani ma’muriy sudi mazkur murojaatni 2019-yil 3-dekabr kuni ko‘rib chiqqan va inspektorlar tomonidan chiqarilgan qarorlar bekor qilgan, ya’ni sud ma’muriy jazoni bekor qilgan.
Izoh (0)