DXX Samarqand viloyati boshqarmasi Bosh prokuratura huzuridagi Majburiy ijro byurosi va viloyat ichki ishlar boshqarmasi hamkorligida tezkor tadbir o‘tkazildi. Bu haqda DXX matbuot xizmati “Daryo”ga xabar berdi.
Tezkor tadbir davomida Samarqand tumanida yashovchi R.B. o‘zining 19 sotix maydondagi issiqxonasida tabiiy gazdan foydalanish uchun tegishli ruxsatnoma olmasdan, issiqxonasi yonida joylashgan Qurolli Kuchlar kichik mutaxassislarni tayyorlash markazi avtodromi hududidan o‘tuvchi 500 diametrli tabiiy gaz quvuriga yashirin ravishda ulanib olgan. Natijada davlatga qariyb 362,5 million so‘mlik zarar yetkazgan.
Shuningdek, R.B.ning qing‘irligi ayrim fuqarolarga ham qo‘l kelgan. Uning o‘g‘rincha gaz quvuriga ulangan holda o‘z issiqxonalarini isitgan shaxslar – M.S. 324 million so‘m, A.J. 591 million so‘m, V.D. 553 million so‘m hamda B.I. 763 million so‘m — jami 2,5 milliard so‘mdan ziyod miqdorda davlatga zarar yetkazgan.
Shuningdek, Pastdarg‘om tumanida o‘tkazilgan tezkor tadbir davomida R.L. 1,4 gektarlik maydondagi issiqxonasida tabiiy gazdan noqonuniy ravishda foydalanilib kelganligi aniqlandi. Ya’ni u mahalliy aholiga gaz yetkazib beruvchi 159 diametrli o‘rta bosimli gaz quvuriga 50 diametrli gaz quvurini yer ostidan ulab olgan. Natijada davlat manfaatlariga 2,4 milliard so‘mdan ziyod miqdorda zarar yetkazgan.
Hozirda qayd etilgan holatlar yuzasidan tergov olib borilmoqda.
Avvalroq Qarshida gaz tarmog‘iga noqonuniy ulangan g‘isht zavodi budjetga salkam 400 million so‘m zarar yetkazgani haqida xabar berilgan edi.
Izoh (0)