Бандлик ва меҳнат муносабатлари вазирлиги 2019 йил пахта йиғим-терими мавсуми давомида мажбурий меҳнатга йўл қўйганлиги сабабли маъмурий жаримага тортилган шахслар рўйхатини эълон қилган эди. Мазкур рўйхатга кўра, Қорақалпоғистоннинг Хўжайли туманидаги 7, 8, 9 ва 31-сонли мактаб директорлари мажбурий меҳнатга йўл қўйган ва маъмурий жаримага тортилган.
Қорақалпоғистон Халқ таълими вазирлиги матбуот хизматининг хабар беришича, вазирликнинг назорат-ҳуқуқий хизмати томонидан мазкур иш ўрганилиб чиқилган ва меҳнат-ҳуқуқ инспекторлари шошма-шошарликка йўл қўйгани аниқланган. Меҳнат-ҳуқуқ инспекторлари маълумотларни қанчалик мажбурий меҳнатга тааллуқлилигини ўрганмасдан, мажбурий меҳнат рўй бермаган ҳолатлар юзасидан баённомалар расмийлаштириб, Маъмурий жавобгарлик тўғрисидаги кодекснинг 51-моддаси 1-қисми билан маъмурий жавобгарликка тортиш ҳақида асоссиз қарорлар қабул қилган.
Хўжайли туманидаги 7, 8, 9 ва 31-сонли умумтаълим мактаб директорлари меҳнат инспекторлари Л.Қ. ва Ж.К.нинг уларга нисбатан энг кам ойлик иш ҳақининг 10 баравари миқдорида маъмурий жаримага тортиш ҳақидаги қарорларидан норози бўлиб, Хўжайли тумани маъмурий судига мурожаат қилган.
Хўжайли тумани маъмурий суди мазкур мурожаатни 2019 йил 3 декабрь куни кўриб чиққан ва инспекторлар томонидан чиқарилган қарорлар бекор қилган, яъни суд маъмурий жазони бекор қилган.
Изоҳ (0)