Toshkent shahar hokimiyatida 28-yanvar kuni Janubiy Koreyaning CM Entech kompaniyasi vakillari va Osiyo Taraqqiyot banki (OTB) maslahatchilari bilan uchrashuv bo‘lib o‘tdi. Uchrashuvda Toshkent shahrining isitish tizimini modernizatsiya qilish bo‘yicha loyiha muhokama qilindi. Bu haqda Toshkent shahar hokimligi matbuot xizmati xabar berdi.
Ma’lum qilinishicha, tomonlar CM Entech kompaniyasi bilan Toshkent shahrida isitish tizimini modernizatsiya qilish loyihasi bo‘yicha davlat-xususiy sheriklikni amalga oshirish masalasini muhokama qildi. Xususan, Mirzo Ulug‘bek tumanidagi 2-issiqlik markazini rekonstruktsiya qilish taklif qilindi. Markazda yopiq issiqlik ta'minoti tizimiga o‘tish, eskirgan va ishdan chiqqan issiqlik tarmoqlarini modernizatsiya qilish, boshqa joyga ko‘chirish, “aqlli” issiqlik o‘lchash moslamalari va “aqlli” isitish tizimini joriy etish rejalashtirilgan.
Toshkent shahar hokimining o‘rinbosari — Uy-joy kommunal xizmatlarini ko‘rsatish Bosh boshqarmasi boshlig'i Baxtiyor Rahmonqulov mazkur ishlar tariflarning oshishiga olib kelmasligi kerakligini ta‘kidladi.
Qayd etilishicha, tomonlar fevral oyining birinchi haftasida kompaniya tomonidan loyiha konsepsiyasining taqdim etilishga kelishib oldi. Loyihaning qiymati taxminan 70—100 million dollarga baholanmoqda, aniq qiymat texnik-iqtisodiy asosni o‘rganish ishlaridan keyin aniqlanadi.
Ta’kidlanishicha, ushbu loyihaning amalga oshirilishi gaz narxini pasaytirishga va tashish paytida issiqlik yo‘qotilishini 30 foizga kamaytirishga xizmat qilishi kutilmoqda.
Osiyo Taraqqiyot banki Toshkent shahri issiqlik ta‘minoti tizimini uzoq muddatli shartnoma asosida ishonchli boshqaruvga o‘tkazish bo‘yicha loyihaning bitimlari bo‘yicha eksklyuziv maslahatchi hisoblanadi. OTBning maslahatchi sifatidagi roli xorijiy kompaniyalardan tushgan takliflarni texnik, huquqiy va moliyaviy baholashdan iborat.
Izoh (0)