Bir umr kutib, futbolga qaytgan Babayan, AESni himoya qilgan Ekopartiya va, albatta, Jumanazar aka. 2019-yil memlari

2019-yil qovunlar, memlar-u xayplar yili bo‘ldi desak, ayni mo‘ljalga urgan bo‘lamiz. Quyida yil sarhisobi tariqasida ijtimoiy tarmoqlar va messenjerlarda trendda bo‘lgan yil mavzulari va ularga bag‘ishlangan memlarni siz bilan o‘rtoqlashamiz.

Yodingizda bo‘lsa, 2018-yilda O‘zbekiston futbol terma jamoasi sobiq murabbiyi Samvel Babayanning mamlakatdagi futbol sohasidagi har qanday faoliyatiga nisbatan umrbod cheklov o‘rnatilgan edi. Oradan bir yil o‘tib Babayan “Lokomotiv”ga qaytdi. Quyidagi mem shu haqda:

Oktabr oyi boshlarida “o‘zga sayyoraga borib kelgan” Jumanazar aka voqeasi internetda katta munosabatlar to‘lqiniga sabab bo‘ldi. Kulgan kim-u, bularning barchasi bo‘layotgan siyosiy jarayonlardan xalqni chalg‘itish uchun o‘ylab topilgan o‘yin deya jig‘ibiyroni chiqqan kim. “Daryo”da avvalroq bu mavzuning turli talqinlari va unga aloqador memlar e’lon qilingan edi.

Deyarli har yil qish oylarida trendga chiqadigan gaz va elektr toki muammosi bu yil ham, afsuski, biz bilan birga. Ijtimoiy tarmoqlarda bu mavzuga aloqador shikoyatlar-u murojaatlar, memlar-u latifalar talaygina.

2019-yil mobil qurilmalarning IMEI-kodlarini ro‘yxatdan o‘tkazish tizimi yo‘lga qo‘yilgani bilan ham esda qoldi. Ro‘yxatga olish ishlari aprel oyi boshlaridan boshlangan edi. Jarayon uch bosqichdan iborat bo‘ldi:

- 1-apreldan 1-noyabrgacha avtomatik tarzda bepul;

- 1-noyabrdan 1-dekabrgacha ariza orqali;

- 1-dekabrdan boshlab ariza orqali pullik.

2019-yilda eng ko‘p qovun saylovoldi tashviqotlar jarayonida tushirildi desa bo‘ladi. Ekopartiya vakillarining “Butun dunyoda ekologik partiyalar AES qurilishiga qarshi, biz esa buni qo‘llab-quvvatlaymiz” mazmunidagi so‘zlari o‘ziga xos ijtimoiy to‘lqinni vujudga keltirdi. O‘zbekistonda AES qurilishiga nisbatan keskin qarshiliklarga o‘zbek tilida tarjimasi e’lon qilingan va ko‘plab muhokamalarga sabab bo‘lgan “Chernobil” teleseriali ham ma’lum ma’noda sababchi bo‘ldi. Biz ham “Rezonans” loyihasi doirasida ushbu mavzu bo‘yicha fikrlar taqdim etgan edik. Dasturni YouTube’dagi sahifamizda tomosha qilishingiz mumkin.

Quyida – shu haqda karikatura:

Xorijga eksport qilinadigan gaz hajmi oshirilishi rejalashtirilayotgani haqida yoz oylarida chiqqan xabar hali qish kelmay turib muhokamalar, noroziliklar va hangomalarga sabab bo‘lib ulgurdi.

2019-yil vazirlardan tortib hokimlargacha, partiya rahbarlaridan tortib qo‘mita, uyushma raislarigacha, barchasi uchun xalq ko‘nglidan joy olish yili bo‘ldi. “Horami”, “shessekund”, “ariqmen”ning hokim bo‘lishi, uylarning buzilishi, “jinoyatga moyil ayollar ro‘yxati”, “2,5 million so‘m maosh”, “propiska”… Bu ro‘yxatni uzoq davom ettirish mumkin. Quyidagi mem yuqorida sanalganlarning barchasini bir qilib urgan o‘q desak bo‘larmikan?

Buni hali unutmagan bo‘lsangiz kerak – andijonlik shoir Sharofiddin Boltaboyevga “Ravon mingim kelyapti, paxta tergim kelyapti” she’ri uchun viloyat hokimi sovg‘asi – Nexia avtomobili topshirildi. Bu xabar shusiz ham xayplarga to‘lib-toshgan o‘zbek internetini portlatdi.

2019-yil O‘zbekiston uchun trollarni qayta kashf etilish yili bo‘ldi. Nurbek Alimov va Dilbar Ismatullayevaning shu masala yuzasidan surishtiruvi ayniqsa Facebook’ni “trollatib yubordi”.

Saylovoldi kampaniyasi paytida “Milliy tiklanish” partiyasi rahbari Alisher Qodirovning migratsiya yuzasidan UzReport telekanalidagi chiqishida bildirgan fikrlari ham internetni “yondirish”da yuqoridagi mavzulardan sira qolishmadi. “O‘zini hurmat qilgan odam 50 dollarni iqtisod qilish uchun yonib ketishi aniq bo‘lib turgan avtobusga o‘tirib, 50 daraja sovuqda yo‘lga chiqmaydi”, dedi u.

Yaqinda O‘zbekistonda parlamentga saylov bo‘lib o‘tdi. Jarayon shaffofligi ta’minlanishiga qanchalik harakat qilinmasin, baribir ayrim qing‘ir ishlarning misi chiqib qoldi. “Pachkalab” qutiga tashlangan byulletenlar, Nozim Safarining tishlangan qo‘li, qayta saylov jarayonlari…

Yakunlanib borayotgan 2019-yil “snos”lar mojarosi bilan ham esda qolarli bo‘ldi, shunday emasmi? Yil davomida Farg‘ona, Qashqadaryo va Xorazm viloyatlari hokimlari keskin tanqidlarga uchradi. Xorazmdagi “snos”lar masalasida bosh vazir yig‘ilish o‘tkazdi, Yakkabog‘da tadbirkor do‘konini buzmoqchi bo‘lgan hokim o‘rinbosarini yoqib yubordi.

Bizni 2020-yilda qanday xayp, mem va qovunlar guldastasi kutmoqda? Ko‘ramiz.