Бир умр кутиб, футболга қайтган Бабаян, АЭСни ҳимоя қилган Экопартия ва, албатта, Жуманазар ака. 2019 йил мемлари

2019 йил қовунлар, мемлар-у хайплар йили бўлди десак, айни мўлжалга урган бўламиз. Қуйида йил сарҳисоби тариқасида ижтимоий тармоқлар ва мессенжерларда трендда бўлган йил мавзулари ва уларга бағишланган мемларни сиз билан ўртоқлашамиз.

Ёдингизда бўлса, 2018 йилда Ўзбекистон футбол терма жамоаси собиқ мураббийи Самвел Бабаяннинг мамлакатдаги футбол соҳасидаги ҳар қандай фаолиятига нисбатан умрбод чеклов ўрнатилган эди. Орадан бир йил ўтиб Бабаян «Локомотив»га қайтди. Қуйидаги мем шу ҳақда:

Октябрь ойи бошларида «ўзга сайёрага бориб келган» Жуманазар ака воқеаси интернетда катта муносабатлар тўлқинига сабаб бўлди. Кулган ким-у, буларнинг барчаси бўлаётган сиёсий жараёнлардан халқни чалғитиш учун ўйлаб топилган ўйин дея жиғибийрони чиққан ким. «Дарё»да аввалроқ бу мавзунинг турли талқинлари ва унга алоқадор мемлар эълон қилинган эди.

Деярли ҳар йил қиш ойларида трендга чиқадиган газ ва электр токи муаммоси бу йил ҳам, афсуски, биз билан бирга. Ижтимоий тармоқларда бу мавзуга алоқадор шикоятлар-у мурожаатлар, мемлар-у латифалар талайгина.

2019 йил мобил қурилмаларнинг IMEI-кодларини рўйхатдан ўтказиш тизими йўлга қўйилгани билан ҳам эсда қолди. Рўйхатга олиш ишлари апрель ойи бошларидан бошланган эди. Жараён уч босқичдан иборат бўлди:

- 1 апрелдан 1 ноябргача автоматик тарзда бепул;

- 1 ноябрдан 1 декабргача ариза орқали;

- 1 декабрдан бошлаб ариза орқали пуллик.

2019 йилда энг кўп қовун сайловолди ташвиқотлар жараёнида туширилди деса бўлади. Экопартия вакилларининг «Бутун дунёда экологик партиялар АЭС қурилишига қарши, биз эса буни қўллаб-қувватлаймиз» мазмунидаги сўзлари ўзига хос ижтимоий тўлқинни вужудга келтирди. Ўзбекистонда АЭС қурилишига нисбатан кескин қаршиликларга ўзбек тилида таржимаси эълон қилинган ва кўплаб муҳокамаларга сабаб бўлган «Чернобиль» телесериали ҳам маълум маънода сабабчи бўлди. Биз ҳам «Резонанс» лойиҳаси доирасида ушбу мавзу бўйича фикрлар тақдим этган эдик. Дастурни YouTube’даги саҳифамизда томоша қилишингиз мумкин.

Қуйида – шу ҳақда карикатура:

Хорижга экспорт қилинадиган газ ҳажми оширилиши режалаштирилаётгани ҳақида ёз ойларида чиққан хабар ҳали қиш келмай туриб муҳокамалар, норозиликлар ва ҳангомаларга сабаб бўлиб улгурди.

2019 йил вазирлардан тортиб ҳокимларгача, партия раҳбарларидан тортиб қўмита, уюшма раисларигача, барчаси учун халқ кўнглидан жой олиш йили бўлди. «Ҳорами», «шессекунд», «ариқмен»нинг ҳоким бўлиши, уйларнинг бузилиши, «жиноятга мойил аёллар рўйхати», «2,5 миллион сўм маош», «прописка»… Бу рўйхатни узоқ давом эттириш мумкин. Қуйидаги мем юқорида саналганларнинг барчасини бир қилиб урган ўқ десак бўлармикан?

Буни ҳали унутмаган бўлсангиз керак – андижонлик шоир Шарофиддин Болтабоевга «Ravon мингим келяпти, пахта тергим келяпти» шеъри учун вилоят ҳокими совғаси – Nexia автомобили топширилди. Бу хабар шусиз ҳам хайпларга тўлиб-тошган ўзбек интернетини портлатди.

2019 йил Ўзбекистон учун тролларни қайта кашф этилиш йили бўлди. Нурбек Алимов ва Дилбар Исматуллаеванинг шу масала юзасидан суриштируви айниқса Facebook’ни «троллатиб юборди».

Сайловолди кампанияси пайтида «Миллий тикланиш» партияси раҳбари Алишер Қодировнинг миграция юзасидан UzReport телеканалидаги чиқишида билдирган фикрлари ҳам интернетни «ёндириш»да юқоридаги мавзулардан сира қолишмади. «Ўзини ҳурмат қилган одам 50 долларни иқтисод қилиш учун ёниб кетиши аниқ бўлиб турган автобусга ўтириб, 50 даража совуқда йўлга чиқмайди», деди у.

Яқинда Ўзбекистонда парламентга сайлов бўлиб ўтди. Жараён шаффофлиги таъминланишига қанчалик ҳаракат қилинмасин, барибир айрим қинғир ишларнинг миси чиқиб қолди. «Пачкалаб» қутига ташланган бюллетенлар, Нозим Сафарининг тишланган қўли, қайта сайлов жараёнлари…

Якунланиб бораётган 2019 йил «снос»лар можароси билан ҳам эсда қоларли бўлди, шундай эмасми? Йил давомида Фарғона, Қашқадарё ва Хоразм вилоятлари ҳокимлари кескин танқидларга учради. Хоразмдаги «снос»лар масаласида бош вазир йиғилиш ўтказди, Яккабоғда тадбиркор дўконини бузмоқчи бўлган ҳоким ўринбосарини ёқиб юборди.

Бизни 2020 йилда қандай хайп, мем ва қовунлар гулдастаси кутмоқда? Кўрамиз.