Suriya shimolida Turkiya bilan chegaradosh hududda joylashgan Al-Bob shahrida yuz bergan portlash oqibatida 18 nafar tinch aholi vakili halok bo‘ldi, 27 nafar odam turli darajadagi tan jarohatlari oldi, deya xabar berdi “TASS”.
Turkiya mudofaa vazirligi Twitter’da bergan ma’lumotda portlashda 10 nafar odamning qurbon bo‘lgani, 15 nafar fuqaroning jarohatlangani bildirilgan. Hodisa bomba o‘rnatilgan avtomobilning avtobus stansiyasida portlashi oqibatida ro‘y bergan. Vazirlik axborotiga ko‘ra terakt ortida Turkiyada taqiqlangan “Kurdiston ishchi partiyasi” terrorchilari turibdi.
2016-yilda Al-Bob shahrida “Frot qalqoni” operatsiyasi davomida “Kurdiston ishchi partiyasi” terrorchilaridan “tozalangan”.
“Tinchlik bulog‘i” operatsiyasi haqida
9-oktabrda Anqara Suriya shimoli-sharqida Turkiyadagi qochoqlar uchun xavfsiz zona tashkil etish maqsadida “Suriya demokratik kuchlari” kurd jangarilari va IShID terrorchilariga qarshi “Tinchlik bulog‘i” harbiy operatsiyasini boshlagan. Dunyo davlatlari turklarning ushbu harakatlarini qoralagan.
17-oktabrda Anqara va Vashington Suriya shimoli-sharqidagi operatsiyani 120 soatga, kurdlar xavfsiz zona hududidan chiqib ketishi uchun to‘xtatishni kelishib oldi va sanksiyalar bekor qilindi.
22-oktabrda Sochida Rossiya prezidenti Vladimir Putin va Turiya davlat rahbari Rajab Toyyib Erdo‘g‘on Suriya hududidagi notinch vaziyatni muhokama qildi va “Tinchlik bulog‘i” operatsiyasini 23-oktabrdan yana 150 soatga to‘xtatish va o‘t ochmaslik haqidagi shartlashuv muddati yakuniga yetgach hamkorlikda Turkiya—Suriya chegarasida 30 kilometrlik hududni barpo etish uchun qo‘shma patrul tadbirlari o‘tkazish haqida memorandum imzoladi.
1-noyabrda kurdlarning Turkiya chegarasidan 30 kilometr uzoqlikka chekingani va ular tark etgan hududni Sochida imzolangan memorandumga muvofiq Suriya qo‘shinlari va Rossiya harbiy politsiyasi egallashi ma’lum bo‘ldi. 5-noyabrda Turkiya hamda Rossiya harbiylari Suriya shimolidagi Ayn-al-Arab aholi punktidagi (Kobani) ikkinchi qo‘shma patrul tadbirlarini boshladi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)