12-oktabrga o‘tar kechasi Petrovsk tumanida yuz bergan yo‘l-transport hodisasi oqibatida O‘zbekiston fuqarosi M.S. halokat joyida vafot etdi, 5 nafar o‘zbekistonlik jarohat bilan tuman kasalxonasiga joylashtirildi. Bu haqda Rossiya FVVning Saratov viloyati bo‘yicha bosh boshqarmasi bergan ma’lumotlariga asoslanib TIV matbuot xizmati xabar berdi.
O‘zbekistonning Qozon shahridagi bosh konsulxonasi mazkur vaziyatni o‘z nazoratiga oldi hamda marhumaning jasadini vatanga yuborish bilan bog‘liq konsullik-huquqiy va tashkiliy masalalar bilan shug‘ullanmoqda.
“Konsullik-huquqiy departamenti marhumaning oila a’zolari va yaqinlariga ta’ziya bildiradi va Rossiyaning Volgabo‘yi federal okrugi (Boshqirdiston, Kirov viloyati, Mariy El respublikasi, Mordoviya respublikasi, Nijegorod viloyati, Orenburg viloyati, Penza viloyati, Perm o‘lkasi, Samara viloyati, Saratov viloyati, Tatariston, Udmurtiya, Ulyanov viloyati, Chuvashiya) hududida bo‘lib turgan O‘zbekiston fuqarolariga ular zarurat tug‘ilgan holatlarda Qozon shahridagi mamlakatimiz bosh konsulxonasiga quyidagi telefon raqamlari orqali murojaat qilishlari mumkinligini ma’lum qiladi: +7-843-526-55-64, +7-843-526-55-65”, — deyiladi xabarda.
Izoh (0)