Namangandagi 705 ta maktabdan faqat 5 tasi markazlashgan issiqlik bilan ta’minlangan

Namangan viloyatida maktabgacha ta’lim, xalq ta’limi, sog‘liqni saqlash sohalari bilan bog‘liq ayrim muammolar ham hanuzgacha saqlanib qolmoqda. Bu haqda viloyat hokimi Xayrullo Bozorov 12-oktabr kuni O‘zbekiston Senatidagi chiqishi davomida to‘xtalib o‘tdi.

Jumladan, bolalarni maktabgacha ta’lim muassasalariga qamrab olish borasidagi ko‘rsatkichlar viloyat bo‘yicha 43 foizni tashkil etgan bir paytda bu ko‘rsatkich Namangan shahrida 28,6, Namangan va Norin tumanlarida 35,9, Chortoq tumanida 36,1 va Yangiqo‘rg‘on tumanida 37,7 foizni tashkil etadi.

Umumta’lim maktablarida qator fanlar bo‘yicha oliy ma’lumotli o‘qituvchilar yetishmaydi. “705 ta umumta’lim maktabidan bor-yo‘g‘i 5 tasi markazlashgan issiqlik tarmog‘i bilan ta’minlangan. 11 ta maktabda qo‘shimcha o‘quv binolari qurish, 16 ta maktab binosini mukammal ta’mirlash talab etiladi”, — dedi hokim.

Bundan tashqari, viloyatdagi sog‘liqni saqlash muassasalarida 210 nafarga yaqin tor doiradagi mutaxassislarga va 250 nafardan ziyod umumiy amaliyot shifokorlariga ehtiyoj mavjud.