Deputat: Amudaryo tuman tez yordam bo‘limiga 40 ta, aholisi undan ikki baravar ko‘p Urgutda 30 ta o‘rin ajratilgan. Mantiq qani?

Sog‘liqni saqlash sohasidagi islohotlar uchun mas’ul etib belgilangan Oliy Majlis Qonunchilik palatasi parlament nazoratining barcha ta’sirchan shakllaridan unumli foydalanmoqda. Bu haqda Qonunchilik palatasi deputati Jamshid Pirmatov fikr yuritgan.

Biroq joylarda xalq bilan o‘tkazilayotgan uchrashuvlar, saylovchilarni qiynayotgan muammolarni o‘rganishlar mobaynida mazkur sohada hali ham qator muammolar saqlanib turgani oydinlashmoqda, ko‘plab kamchiliklar mavjudligi yaqqol ko‘zga tashlanyapti.

O‘tgan yili ham, hozir ham respublika bo‘yicha olib borilgan o‘rganishlarga asosan aniqlangan kamchilik va muammolar bir necha bor Sog‘liqni saqlash vazirligi rahbariyatiga, qolaversa, tegishli vazirlik va idoralar oldiga qo‘yildi, bu boradagi ishlar hali ham davom etmoqda. Ammo shunga qaramay, aksariyat masalalar yechilishida ijobiy natija, oldinga siljish sezilmayapti.

Xususan, aksariyat tuman va shaharlarda shoshilinch tibbiy yordam bo‘limlari tashkil qilingan bo‘lib, ularning normativlari, ya’ni shifo o‘rinlari (koyka) soni nomutanosib holda belgilangan. Bunda aholi soni va kasallanish holati hisobga olinmasdan qolmoqda.

Masalan, 171 ming aholi mavjud bo‘lgan G‘allaorol tumani tibbiyot birlashmasining reanimatsiya bo‘limida ham, 46 ming aholi yashaydigan Zafarobod tumani reanimatsiya bo‘limida ham shifo o‘rinlari soni 6 ta etib belgilangan. Yoki Amudaryo tumani aholisi 195 ming nafar bo‘lib, shoshilinch tibbiy yordam bo‘limiga 40 ta koyka ajratilgan bo‘lsa, 481 ming aholisi bo‘lgan Urgut tumanida ShTYo shifo o‘rinlari 30 tani tashkil etadi.

Bu esa ayrim tibbiyot muassasalarida ko‘plab tirbandlik kelib chiqishi va aholining haqli e’tirozlariga sabab bo‘lmoqda.

Mazkur muammo Sog‘liqni saqlash vazirligi oldiga shifo o‘rinlarini (koyka) xatlovdan o‘tkazib, tahlil qilish, Moliya vazirligi bilan birgalikda yangi ishlab chiqilgan normativlarni tasdiqlash va hayotga joriy etish vazifasini qo‘yishi tabiiy edi. Biroq ushbu vazifa vazifaligicha qolyapti, deputatlarning jon kuydirishlari foyda bermayapti.

Mana shunday real muammolar, kamchilik va yechilishi zarur bo‘lgan masalalar sohaning Prezident qo‘yayotgan talablar asosida rivojlanishiga to‘sqinlik qilyapti. Sog‘liqni saqlash vazirligi mutasaddilari esa amaliy ishlar bilan birga, asosan balandparvoz gaplar, jimjimador raqamlar ortidan quvish bilan band bo‘lib qolmoqda.