Соғлиқни сақлаш соҳасидаги ислоҳотлар учун масъул этиб белгиланган Олий Мажлис Қонунчилик палатаси парламент назоратининг барча таъсирчан шаклларидан унумли фойдаланмоқда. Бу ҳақда Қонунчилик палатаси депутати Жамшид Пирматов фикр юритган.
Бироқ жойларда халқ билан ўтказилаётган учрашувлар, сайловчиларни қийнаётган муаммоларни ўрганишлар мобайнида мазкур соҳада ҳали ҳам қатор муаммолар сақланиб тургани ойдинлашмоқда, кўплаб камчиликлар мавжудлиги яққол кўзга ташланяпти.
Ўтган йили ҳам, ҳозир ҳам республика бўйича олиб борилган ўрганишларга асосан аниқланган камчилик ва муаммолар бир неча бор Соғлиқни сақлаш вазирлиги раҳбариятига, қолаверса, тегишли вазирлик ва идоралар олдига қўйилди, бу борадаги ишлар ҳали ҳам давом этмоқда. Аммо шунга қарамай, аксарият масалалар ечилишида ижобий натижа, олдинга силжиш сезилмаяпти.
Хусусан, аксарият туман ва шаҳарларда шошилинч тиббий ёрдам бўлимлари ташкил қилинган бўлиб, уларнинг нормативлари, яъни шифо ўринлари (койка) сони номутаносиб ҳолда белгиланган. Бунда аҳоли сони ва касалланиш ҳолати ҳисобга олинмасдан қолмоқда.
Масалан, 171 минг аҳоли мавжуд бўлган Ғаллаорол тумани тиббиёт бирлашмасининг реанимация бўлимида ҳам, 46 минг аҳоли яшайдиган Зафаробод тумани реанимация бўлимида ҳам шифо ўринлари сони 6 та этиб белгиланган. Ёки Амударё тумани аҳолиси 195 минг нафар бўлиб, шошилинч тиббий ёрдам бўлимига 40 та койка ажратилган бўлса, 481 минг аҳолиси бўлган Ургут туманида ШТЁ шифо ўринлари 30 тани ташкил этади.
Бу эса айрим тиббиёт муассасаларида кўплаб тирбандлик келиб чиқиши ва аҳолининг ҳақли эътирозларига сабаб бўлмоқда.
Мазкур муаммо Соғлиқни сақлаш вазирлиги олдига шифо ўринларини (койка) хатловдан ўтказиб, таҳлил қилиш, Молия вазирлиги билан биргаликда янги ишлаб чиқилган нормативларни тасдиқлаш ва ҳаётга жорий этиш вазифасини қўйиши табиий эди. Бироқ ушбу вазифа вазифалигича қоляпти, депутатларнинг жон куйдиришлари фойда бермаяпти.
Мана шундай реал муаммолар, камчилик ва ечилиши зарур бўлган масалалар соҳанинг Президент қўяётган талаблар асосида ривожланишига тўсқинлик қиляпти. Соғлиқни сақлаш вазирлиги мутасаддилари эса амалий ишлар билан бирга, асосан баландпарвоз гаплар, жимжимадор рақамлар ортидан қувиш билан банд бўлиб қолмоқда.
Изоҳ (0)