20-sentabr kuni kechki soat 22:00 da o‘zbek muhojirlari o‘tirgan kvartiraga mahalliy politsiya bostirib kirgan.
Ular bu xonadonda 10 kilogramm narkotik modda borligini iddao qilib, muhojirlarni kaltaklay boshlagan. Muhojirlardan ikki nafari 2-qavatdan sakrab, qochmoqchi bo‘lgan va og‘ir jarohatlar bilan reanimatsiyaga yotqizilgan.
Ikkinchi qavatdan qulagan ikki o‘zbekistonlik behush holatda pastda yotgan va ularni o‘tib ketayotgan tojikistonlik boshqa migrantlar ko‘rib qolib, “Tez yordam” chaqirgan.
“Tez yordam” kelishi bilanoq migrantning kvartirasida bo‘lgan uch politsiyachi podyezd ichkarisida kutib turgan boshqa sheriklari bilan hodisa joyidan qochib ketgan.
TIV matbuot xizmatining xabar berishicha, 25-sentabr kuni O‘zbekistonning Rossiyadagi elchixonasi konsullik bo‘limi xodimlari O‘zbekiston fuqarolari I.X. va D.B.ning holidan xabar oldi.
Jabrlanganlarning so‘zlariga ko‘ra, ular federal ahamiyatga ega obyektlarda restavratsiya ishlarini olib borish uchun malakali mutaxassis sifatida Rossiyaga taklif qilingan.
Elchixona vaziyatni nazoratga oldi va Rossiya Tashqi ishlar vazirligi, Bosh prokuraturasi, Tergov qo‘mitasiga rasmiy murojaat qildi hamda O‘zbekiston Bandlik va mehnat munosabatlari vazirligining Tashqi mehnat migratsiyasi agentligi vakolatxonasi bilan birgalikda fuqarolarni davolatish uchun to‘lovni amalga oshirish masalasini hal qilmoqda.
“Konsullik-huquqiy departamenti eslatib o‘tadiki, Rossiyaning Markaziy federal okrugi (Belgorod viloyati, Bryansk viloyati, Vladimir viloyati, Voronej viloyati, Ivanovo viloyati, Kaluga viloyati, Kastroma viloyati, Kursk viloyati, Lipetsk viloyati, Moskva shahri, Moskvа viloyati, Orlov/Oryol viloyati, Ryazan viloyati, Smolensk viloyati, Tambov viloyati, Tver viloyati, Tula viloyati, Yaroslav viloyati) va Armaniston hududidagi fuqarolarimiz zarur vaziyatlarda Moskva shahridagi Elchixonaga quyidagi telefon raqamlari orqali murojaat qilishlari mumkin: : +7 499 230-00-76, +7 499 238-36-20”, — deyiladi xabarda.
Izoh (0)