O‘zbekiston tashqi ishlar vaziri Abdulaziz Komilov 24-sentabr, seshanba kuni BMT Bosh Assambleyasi 74-sessiyasi doirasida Nyu-Yorkda AQSh Davlat kotibining Janubiy va Markaziy Osiyo bo‘yicha yordamchisi vazifasini bajaruvchi Elis Uells bilan uchrashdi.
O‘zbekiston Tashqi ishlar vazirligidan ma’lum qilishlaricha, uchrashuvda o‘z ishini yakunlagan “Markaziy Osiyo—AQSh” (“C5+1”) shaklidagi navbatdagi vazirlar uchrashuvining natijalari yuzasidan fikr almashilgan. Ushbu uchrashuv ko‘p tomonlama hamkorlikni rivojlantirishning istiqbolli yo‘nalishlarini konstruktiv ruhda muhokama qilish imkonini bergani qayd etilgan.
“Elis Uells ikki tomonlama munosabatlarning bugungi holatini yuqori baholar ekan, ularni ‘to‘laqonli va keng qamrovli’ deya baholadi. Diplomat O‘zbekistonda inson huquqlarini himoya qilish, fuqarolik jamiyati institutlari bilan o‘zaro hamkorlik sohasida erishilgan yutuqlarni olqishladi va hozirgi o‘zgarish dinamikasi davom etishiga umid bildirdi”, — deyiladi TIV axborotida.
Uchrashuv davomida afg‘onlararo tinchlik jarayonini ilgari surish masalalari alohida muhokama qilingan, Afg‘onistonni iqtisodiy, ijtimoiy va infratuzilmaviy qayta tiklash bo‘yicha sa’y-harakatlarni jipslashtirish muhimligi ta’kidlangan.
Izoh (0)