Bundan avval “Daryo”da “Oliy sud raisining sobiq o‘rinbosari Bahodir Dehqonov sabab 12 yilga qamalgan samarqandlik tadbirkor Prezidentdan najot kutmoqda” nomli maqola e’lon qilingan. Unda samarqandlik Farida Burhonova turmush o‘rtog‘i Sherzod Burhonov tergov jarayonlarining noto‘g‘ri olib borilishi va prokuraturaning sudga ta’sir ko‘rsatishi natijasida nohaq qamalganligini bildirib murojaat qilgandi. Oliy sud matbuot xizmati ‘‘Daryo’’ga shikoyatlarga bog‘liq sud qarorini taqdim qildi.
Jinoyat ishlari bo‘yicha Samarqand shahar sudining 2017-yil 3-fevral kunidagi hukmiga ko‘ra, Sherzod Burhonov Jinoyat kodeksining 165-moddasi (tovlamachilik) 2-qismi “a”, “v” bandlari, 168-moddasi (firibgarlik) 3-qismi “a” bandi, 184-moddasi (soliqlar yoki boshqa majburiy to‘lovlarni to‘lashdan bo‘yin tovlash) 3-qismi, 189-moddasi (savdo yoki xizmat ko‘rsatish qoidalarini buzish), 28, 211-moddasi (pora berishda ishtirok etish) 3-qismi “a” bandi va 243-moddasi (jinoiy faoliyatdan olingan daromadlarni legallashtirish)dagi jinoyatlarda aybli deb topilgan.
Sherzod Burhonovga Jinoyat kodeksining 59 (bir necha jinoyat sodir etganlik uchun jazo tayinlash), 61-moddalari (jazolarni qo‘shishning hisoblash qoidalari) tartibida uzil-kesil eng kam oylik ish haqining 450 baravari, ya’ni 58 608 000 so‘m miqdorida jarima va 12-yil 6 oy muddatga ozodlikdan mahrum qilish jazosi tayinlagan.
Sherzod Burhonovga nisbatan Oliy Majlisi Senatining 2016-yil 12-oktabrdagi “O‘zbekiston Respublikasi Konstitutsiyasining 24 yilligi munosabati bilan amnistiya to‘g‘risida”gi qarorining 6-bandi “b” kichik bandi tatbiq etilib, jazoning amnistiya akti chiqqan kunga qadar amalda o‘talgan muddati chegirib tashlanib, qolgan jazosi to‘rtdan bir qismiga qisqartirilgan.
Sherzod Burhonov va uning himoyachilari tomonidan keltirilgan kassatsiya tartibidagi shikoyati jinoyat ishlari bo‘yicha Samarqand viloyati sudi kassatsiya instansiyasida ko‘rib chiqilib, 2017-yil 23-maydagi ajrimiga ko‘ra qanoatlantirilmasdan, jinoyat ishlari bo‘yicha Samarqand shahar sudining 2017-yil 3-fevral kunidagi hukmining Sherzod Burhonovga oid qismi o‘zgarishsiz qoldirilgan.
O‘zbekiston Oliy sudi Jinoyat ishlari bo‘yicha sudlov hay’atining 2018-yil 16-avgustdagi ajrimi bilan Sherzod Burhonovga nisbatan chiqarilgan jinoyat ishlari bo‘yicha Samarqand shahar sudining 2017 yil 3-fevraldagi hukmi hamda jinoyat ishlari bo‘yicha Samarqand viloyati sudi kassatsiya instansiyasining 2017-yil 23-maydagi ajrimi o‘zgartirilib, uning harakati Jinoyat kodeksining 189-moddasidan shu moddaning 1-qismiga qayta kvalifikatsiya qilinib, qonunga muvofiqlashtirilib, tayinlangan eng kam oylik ish haqining 350 baravari miqdoridagi 45 584 000 so‘m jarima jazosi o‘zgarishsiz qoldirilgan.
Sherzod Burhonovga Jinoyat kodeksining 168-moddasi 3-qismi “a” bandi bilan oylik ish haqining 20 foizini davlat daromadi hisobiga ushlab qolgan holda 3 yil axloq tuzatish ishlari jazosi tayinlangan.
Sherzod Burhonovga Jinoyat kodeksining 184-moddasi 3-qismi, 165-moddasi 2-qismi “a”, “v” bandlari, 28, 211-moddasi 3-qismi “a” bandi, 243-moddasi bilan tayinlangan jazolar o‘zgarishsiz qoldirilib, Jinoyat kodeksining 59 va 61-moddalari tartibida tayinlangan jazolar qisman qo‘shish yo‘li bilan uzil-kesil eng kam oylik ish haqining 450 baravari miqdorida 58 608 000 so‘m jarima, 11 yil 6 oy ozodlikdan mahrum qilish jazolari tayinlangan.
Sud qarorlarining qolgan qismi o‘zgarishsiz qoldirilgan.
Bundan tashqari, Sherzod Burhonovning himoyachisi O.Muxtorova Oliy sudi raisi qabulida topshirgan shikoyati jinoyat ishi materiallari asosida o‘rganib chiqilib, unga 2019-yil 7-mart kuni O‘zbekiston Respublikasi Oliy sudi raisi tomonidan 13-5680-17 raqamli javob xati bilan berilgan shikoyati qanoatlantirilmasdan qoldirilganligi haqida ma’lum qilingan.
Izoh (0)