O‘zbekiston tashqi ishlar vaziri Abdulaziz Komilov 24-sentabr, seshanba kuni Nyu-Yorkda Birlashgan Arab Amirliklari (BAA) tashqi ishlar va xalqaro hamkorlik vaziri Shayx Abdulla bin Zoid Al Nahayon bilan uchrashdi.
“Muzokaralarda ikki tomonlama munosabatlar, shuningdek, BMT, IHT va boshqa tuzilmalar doirasidagi o‘zaro munosabatlarning holati va rivojlantirish istiqbollari muhokama qilindi”, — deyiladi TIV axborotida.
Uchrashuvda hamkorlikning hozirgi holati va istiqbollarini muhokama qilish va xalqaro muammolar yuzasidan fikr almashish imkonini beruvchi ikki mamlakat tashqi ishlar vazirliklari o‘rtasidagi siyosiy maslahatlashuvlarning navbatdagi raundini o‘tkazish bo‘yicha takliflar ko‘rib chiqilgan.
So‘nggi majlisi 2019-yil mart oyida Toshkentda bo‘lib o‘tgan Savdo-iqtisodiy, investitsion-moliyaviy hamkorlik bo‘yicha hukumatlararo qo‘shma komissiyaning sohadagi aniq tadbirlar, dasturlar va loyihalarni ilgari surishdagi alohida o‘rni qayd etilgan.
Tomonlar siyosiy, savdo-iqtisodiy, investitsion, turistik, madaniy-gumanitar va boshqa sohalardagi hamkorlikni kengaytirishdan manfaatdor ekanligini va buning uchun sezilarli salohiyat mavjudligini tasdiqlagan.
Tashqi ishlar vazirligi matbuot xizmatining qo‘shimcha qilishicha, suhbatda, shuningdek, turli darajalarda bo‘lajak ikki tomonlama uchrashuvlarning vaqti va kun tartibiga oid takliflar ko‘rib chiqilgan.
Izoh (0)