Taqiqlangan tashkilotlarga adashib kirib qolgan fuqarolarning jinoiy javobgarlikdan ozod etishni so‘rab taqdim qilgan murojaatiga asosan besh fuqaro jinoiy javobgarlikdan ozod etiladi. Bu haqda Bosh prokuratura matbuot xizmati “Daryo”ga xabar berdi.
Ma’lum qilinishicha, Bosh prokuraturada 19-sentabr kuni terroristik, ekstremistik va boshqa taqiqlangan tashkilot va guruhlarga adashib kirib qolgan O‘zbekiston fuqarolarining murojaatlarini ko‘rib chiqish bo‘yicha Respublika idoralararo komissiya yig‘ilishi bo‘lib o‘tgan.
Unda taqiqlangan tashkilotlarga adashib kirib qolgan fuqarolarning jinoiy javobgarlikdan ozod etishni so‘rab taqdim etgan murojaatlari “Terroristik, ekstremistik yoki boshqa taqiqlangan tashkilot va guruhlar tarkibiga adashib kirib qolgan O‘zbekiston Respublikasi fuqarolarini jinoiy javobgarlikdan ozod etish tartibini takomillashtirish to‘g‘risida”gi Prezident farmoni asosida ko‘rib chiqilgan.
Yig‘ilish yakuniga ko‘ra, komissiya tomonidan besh fuqaroni jinoiy javobgarlikdan ozod etib, O‘zbekistonga qaytarish hamda ularga ijtimoiy-huquqiy yordam ko‘rsatish va bandligini ta’minlash vazifalari belgilab olingan. Bugungi kunda ushbu masala bo‘yicha yana 6 ta murojaat ishchi guruh tomonidan o‘rganilmoqda.
Izoh (0)