Atom elektr stansiyalarini qurish va ularni ekspluatatsiya qilish bo‘yicha fransuz tajribasini o‘rganish maqsadida o‘zbek delegatsiyasi 10-15-sentabr kunlari Fransiyada xizmat safarida bo‘ldi. Bu haqda Energetika vazirligi matbuot xizmati “Daryo”ga xabar berdi.
Ma’lum bo‘lishicha, delegatsiya Energetika vazirligi, Davlat sanoat xavfsizligi qo‘mitasi, “O‘zatom” agentligi va AES qurilishi bo‘yicha direksiya vakillaridan tashkil topgan.
Vakillar “General Electrick” kompaniyasining “Alstom” zavodi, “Orano” va “FramatomeRomans” kompaniyalari faoliyati bilan yaqindan tanishgan, — deyiladi xabarda.
Safar doirasida, “SEA” atom energetikasi tadqiqotlar markazida Fransiya atom energetikasi sohasidagi davlat tuzilmalari vakillari bilan muzokaralar bo‘lib, atom energiyasidan tinchlik maqsadida foydalanish sohasida hamkorlikni yo‘lga qo‘yish haqida so‘z borgan.
Muzokara davomida o‘zaro hamkorlik, tajriba almashish va kadrlar tayyorlash bo‘yicha aniq chora-tadbirlar belgilangan.
Shuningdek, o‘zbek mutaxassislari Flamanvil shahridagi AES maydonchasi bilan tanishgani ma’lum qilindi.
Ma’lumot uchun, Fransiyaning atom energetika sohasida 58 energoblok, 19 atom elektr stansiyasi faoliyat yuritadi. Ular 2018-yilda elektr energiya ishlab chiqarishning 72 % ta’minladi. Fransiyaning atom energetikasi 220 ming ish o‘rinlarini ta’minlaydi, sohadan budjetga to‘g‘ridan-to‘g‘ri tushumlar yiliga 1,3 milliard yevroni tashkil etadi.
Izoh (0)